धनगढी। सुदूरपश्चिम प्रदेशमा साउन महिनाको पहिलो १७ दिनमै सर्पदंशका ४५ घटना भएका छन् । तीमध्ये दुई जनाको मृत्यु भएको छ ।
सामाजिक विकास मन्त्रालयको तथ्याङ्क अनुसार साउन १ देखि १७ गतेसम्म सर्पले टोकेर एक पुरुष र एक महिलाको ज्यान गएको छ । यस अवधिमा सर्पदंशबाट ४५ जना प्रभावित भएका छन् ।
मन्त्रालयले उपलब्ध गराएको तथ्याङ्कअनुसार घाइतेमध्ये २० जना पुरुष र २४ जना महिला छन् ।
सर्पदंशका घटना बढ्न थालेपछि मन्त्रालयले सर्पले टोकेपछि कुनै पनि घरेलु उपचार वा झारफुकमा नलागी सकेसम्म छिटो सर्पदंशको उपचार हुने स्वास्थ्य संस्थामा पुग्न सबैलाई आग्रह गरेको छ ।
जिल्ला स्वास्थ्य कार्यालय कैलालीका प्रमुख रमेश कुवँरले सर्पदंशकाे जाेखिम याे बर्खा सिजनमा अत्याधिक रहेकाले सचेतना अपनाउन आवश्यक रहेकाे बताए ।
उनले घर वरिपरि सरसफाई देखि यसबाट बच्ने उपायका बारेमा सराेकारवाला निकायले सर्बसाधारणलाई जानकारी गराउनु पर्ने बताए ।
सबै अस्पतालमा सर्पदंशको उपचार उपलब्ध नहुने भएकाले आफ्नो नजिकको उपचार केन्द्रबारे पूर्वजानकारी राख्न पनि मन्त्रालयले अनुरोध गरेको छ ।
वर्षायामसँगै सुदूरपश्चिमका तराई तथा पहाडी जिल्लामा सर्पदंशका घटना बढ्दै जाने गरेको छ ।
समयमै एन्टि–भेनम र उपचार नपाउँदा ज्यानसमेत जोखिममा पर्ने भएकाले चिकित्सकसहित सर्पदंश उपचार केन्द्रको विस्तार आवश्यक रहेको मन्त्रालयले जनाएको छ ।
मन्त्रालयले सर्पदंशलाई जनस्वास्थ्यको गम्भीर समस्याका रूपमा लिएर प्रदेश सरकार र स्थानीय तहले यसको रोकथाम, उपचार सेवा विस्तार तथा जनचेतना अभिवृद्धिमा विशेष ध्यान दिनुपर्ने आवश्यकता औंल्याएको छ ।
