धनगढी । पश्चिम सेती क्षेत्रबाट उत्पादन हुने करिब २,५०० मेगावाट विद्युत् राष्ट्रिय प्रसारण प्रणालीमा जोड्न बझाङ–बनलेक (पश्चिम सेती) ४०० केभी क्षमताको प्रसारण लाइन निर्माण प्रक्रिया अघि बढाइएको छ ।
राष्ट्रिय प्रसारण ग्रिड कम्पनी लिमिटेडले प्रसारण लाइन निर्माणका लागि विद्युत् विकास विभागमा अनुमति माग्दै आवेदन दिएको छ । विद्युत् ऐन, २०४९ अनुसार आवश्यक विवरणसहित अनुमति प्रक्रियाका लागि आवेदन दर्ता गरिएको हो ।
प्रस्तावित ६० किलोमिटर लामो प्रसारण लाइन बझाङको जयपृथ्वी नगरपालिकाको प्रस्तावित चैनपुर सबस्टेसनदेखि डोटीको शिखर नगरपालिका–१० स्थित प्रस्तावित बनलेक (पश्चिम सेती) सबस्टेसनसम्म विस्तार हुनेछ ।
आयोजनाअन्तर्गत ४००/१३२ केभी, १६० एमभीए क्षमताको चैनपुर सबस्टेसन तथा ४००/१३२ केभी, ३१५ एमभीए क्षमताको बनलेक (पश्चिम सेती) सबस्टेसन निर्माण गरिनेछ । प्रसारण लाइनमा १४३ वटा डबल सर्किट टावर रहनेछन् । टावरको अधिकतम उचाइ ६१ मिटर तथा टावरबीचको औसत दूरी ४०८.९९ मिटर रहनेछ भने न्यूनतम दूरी १२७.७९ मिटर हुनेछ ।
आयोजना निर्माणका लागि २९५.४२ हेक्टर जमिन आवश्यक पर्नेछ । त्यसमध्ये ३०.४१ हेक्टर टावर निर्माणका लागि र २६५ हेक्टर विद्युत् मार्ग (राइट अफ वे) का लागि आवश्यक पर्नेछ । सबस्टेसन निर्माणका लागि २१.४१ हेक्टर जग्गा आवश्यक रहेकामा ७ हेक्टर बनलेक र १४.३७ हेक्टर चैनपुर सबस्टेसनका लागि छुट्याइनेछ । प्रसारण लाइनको क्षेत्राधिकार ४६ मिटर रहने जनाइएको छ ।
आयोजना पाँच वर्षभित्र सम्पन्न गर्ने लक्ष्य राखिएको छ । निर्माण तथा सञ्चालनका क्रममा भूक्षय, बाढी, वायु प्रदूषणलगायत वातावरणीय प्रभाव न्यून हुने गरी काम गरिने जनाइएको छ ।
विद्युत् विकास विभागले आयोजनासम्बन्धी आवश्यक सुझाव तथा सल्लाह उपलब्ध गराउन सार्वजनिक सूचनामार्फत सरोकारवालासँग आग्रह गरेको छ ।
