धनगढी । भूमि व्यवस्था, सहकारी, संघीय मामिला तथा सामान्य प्रशासनमन्त्री प्रतिभा रावल भोलि शनिबारदेखि चार दिने सुदूरपश्चिम भ्रमणमा आउने भएकी छन् ।
मन्त्री रावल भदौ ६ देखि ९ गतेसम्म सुदूरपश्चिम प्रदेशका विभिन्न जिल्लामा भ्रमण, अनुगमन तथा स्थानीय तहका पदाधिकारीसँग छलफल गर्ने कार्यक्रम रहेको छ ।
कार्यतालिकाअनुसार मन्त्री रावल भदौ ६ गते बिहान ८ बजे काठमाडौंबाट धनगढी आउनेछन् । धनगढी पुगेपछि उनले कैलालीका प्रमुख जिल्ला अधिकारी तथा मालपोत र नापी कार्यालयका प्रमुखसँग छलफल गर्ने कार्यक्रम छ । त्यसपछि धनगढी उपमहानगरपालिकाको अनुगमन गरी साँझ महेन्द्रनगर जानेछन् ।
भदौ ७ गते बिहान मन्त्री रावलले कञ्चनपुरका प्रमुख जिल्ला अधिकारी तथा मालपोत र नापी कार्यालयका प्रमुखसँग छलफल गर्नेछन् । दिउँसो भीमदत्त, बेदकोट र दोधाराचाँदनी नगरपालिकाको अनुगमन गर्ने कार्यक्रम रहेको छ ।
त्यसैगरी, भदौ ९ गते बिहान १० बजेदेखि १२ बजेसम्म डडेल्धुराका प्रमुख जिल्ला अधिकारी तथा मालपोत र नापी कार्यालयका प्रमुखसँग छलफल गर्ने कार्यक्रम छ । त्यसपछि अमरगढी नगरपालिकाको अनुगमन गरेपछि मन्त्री रावल साँझ महेन्द्रनगर फर्किने कार्यतालिका रहेको छ ।
