काठमाडौँ – दसैँपछिको ठुलो चाड तिहारमा पनि खानपानको बेग्लै महत्त्व हुन्छ । तिहारमा पकाइने विभिन्न परिकार सेल रोटी, अनर्सा वा मिठाई हामी सबैको प्रिय हुन्छ । तर चाडका बेला खाइने यस्ता खानेकुराले स्वास्थ्यमा गम्भीर समस्या पार्न सक्छ । यस अलावा तिहार अन्य कतिपय कारणले समेत स्वास्थ्यमा असर पर्न सक्छ । यस्तोमा केही हेल्थ टिप्स तपाईँका लागि लाभदायक हुनसक्छ ।
– भुलेर पनि खाली पेटमा सेल रोटी नखानु होस् । अन्यथा अम्लपित्त अर्थात् एसिडिटी बढ्ने सम्भावना हुन्छ । साथै सेल रोटी खाँदा फलफूल, सागपात, पानी प्रशस्त सेवन गर्नुहोस् ।
– तिहारमा पकाइने सेल रोटी, अनर्सा लगायतका परीकारमा प्रयोग भएको चिल्लो तथा गुलियोले कोलेस्टेरोल, रक्तचाप, मधुमेह बढाउँछ । त्यसैले यस्ता रोगका बिरामीले कम मात्रामा यी परिकारको सेवन गर्नुहोस् ।
– तेलमा पकाइएका खानेकुरा पचाउन गारो हुने भएकाले पाचन समस्या भएका, पखाला, डाइरीया लागेकाहरूले सकेसम्म चिल्लो परिकार सेवन नगरकै राम्रो हुन्छ ।
– सेल वा अन्य परीकार घ्यू वा बोसोमा पकाउनुको सट्टा सकेसम्म तेलमा नै पकाउनु होला । तिहारमा खाने माछा मासु सम्भव अनुसार ताजा खानु होस् ।
– सेल रोटी पकाउने तेल शुद्ध तोरीको तेल, मकैको तेल, भटमासको तेल वा सूर्यमुखी तेल भए राम्रो हुन्छ । अन्य तेल वा घ्युको प्रयोग नगर्नुहोस् ।
– लामो समय सेल रोटी पकाउँदा, तेलको दियो वा मैनबत्ती कोठामा बाल्दा श्वासप्रश्वासमा समस्या आउन सक्छ । तसर्थ खुला ठाउँमा पकाउने र घरीघरी बाहिर निस्कनुहोस् ।
– चिल्लो मात्र होइन मदिरा स्वास्थ्यका लागि हानिकारक छ । यसको सेवनले मुटु, पेट, कलेजो तथा किड्नीको समस्या आउन सक्छ । तसर्थ मदिरा सेवनबाट टाढा रहनुहोस् ।
– तिहारमा सकेसम्म दूध चिया सेवन नगर्नुहोस् । यसले समेत एसिडीटी बढाउने गर्दछ । बरु कागती हालेको चियाको सेवन गरेमा यसले चिल्लोलाई काट्न मद्दत गर्दछ ।
– जुनसुकै खाना धेरै खाएपछि अनिवार्य पसिना आउन्जेल कुनै व्यायाम वा एक घण्टा पैदल हिँड्नुहोस् ।
– कतिपय मानिसमा तिहारमा तास खेल्ने बानी हुन्छ जसले अबेर रातिसम्म निन्द्रा पूरा नहुन सक्छ । तसर्थ समयमा नै सुत्नु राम्रो हुन्छ ।
