डडेल्धुरा । सुदूरपश्चिम प्रदेशका मुख्यमन्त्री खगराज भट्टले दैजी-जोगबुढा सडक निर्माणलाई प्रदेश सरकारले प्राथमिकतामा राखिसकेको बताएका छन ।
डडेल्धुरा उद्योग वाणिज्य संघसँगको छलफलका क्रममा आज मुख्यमन्त्री भट्टले प्रदेश सरकारको छोटो कार्यकाललाई स्मरणीय बनाउने गरी परिणाममुखी काम गर्ने प्रतिबद्धता व्यक्त गरे ।
उनले उद्योग वाणिज्य संघले उठाएका विकास निर्माण, उद्योग व्यवसाय तथा जिल्लाको समग्र विकाससँग सम्बन्धित विषयहरू महत्वपूर्ण रहेको भन्दै ती सबै विषयलाई गम्भीरताका साथ लिने बताए ।
मुख्यमन्त्री भट्टले सुदूरपश्चिम प्रदेशलाई सुशासनको केन्द्रका रूपमा स्थापित गर्ने गरी प्रदेश सरकार अघि बढिरहेको बताउँदै सेवा प्रवाहलाई प्रभावकारी, पारदर्शी र जनमुखी बनाउन आवश्यक सुधार गरिने उल्लेख गरे ।
उनले प्रदेशको आर्थिक तथा भौतिक विकासका लागि निजी क्षेत्रसँग सहकार्य आवश्यक रहेको बताउँदै उद्योगी-व्यवसायीका समस्या समाधान गर्न प्रदेश सरकार सकारात्मक रहेको धारणा राखे।
छलफलमा उद्योग वाणिज्य संघका पदाधिकारीहरूले डडेल्धुराको सडक, पूर्वाधार, उद्योग-व्यवसाय, पर्यटन तथा आर्थिक विकाससँग सम्बन्धित विभिन्न विषयमा मुख्यमन्त्रीको ध्यानाकर्षण गराएका थिए।
