धनगढी । कैलालीकाे धनगढी उपमहानगरपालिकामा सञ्चालन भइरहेको जापानिज इन्सेफलाइटिस (जेई) विरुद्धको खोप अभियान अन्तर्गत ४९ हजार ९१४ जनाले खोप लगाएका छन् ।
स्वास्थ्य कार्यालय कैलालीको असोज १४ गतेको दैनिक प्रतिवेदनअनुसार आज मात्रै धनगढी उपमहानगरपालिकामा २ हजार ५१२ पुरुष र ३ हजार ५२६ जना महिलाले जेई खोप लगाएका छन्। हाल सम्म धनगढी उपमहानगरपालिकामा १९ हजार १०० जना पुरुष र ३० हजार ८१४ जना महिलाले खोप लगाइसकेको स्वास्थ्य कार्यालय कैलालीका फोकल पर्सन सूर्यबहादुर बिष्टले निशाना न्युजलाई जानकारी दिए।
उनले हालसम्म जिल्लाका तीनवटा पालिकामा १ लाख ६ हजार ५९९ जनाले खोप लगाएको बताए । हालसम्म घोडाघोडी नगरपालिकामा २९,१७५ लम्कीचुहा नगरपालिकामा २७,५१० र धनगढी उपमहानगरपालिकामा ४९,९१४ जनाले जेई खोप लगाएको उनले बताए ।
जिल्लाको कुल लक्षित जनसंख्या १ लाख ७६ हजार ३४४ रहेकोमा हालसम्म ६०.४५ प्रतिशतले खोप लगाइसकेकाे उनले बताए ।
उनले स्थानीय तहअनुसार हालसम्मको खोप कभरेज घोडाघोडी नगरपालिकामा ८७.१२ प्रतिशत, लम्कीचुहा नगरपालिकामा ६९.२३ प्रतिशत र धनगढी उपमहानगरपालिकामा ४८.४०प्रतिशत रहेको बताए ।
कैलालीमा जेई संक्रमणको जोखिमलाई ध्यानमा राखी ३० वर्ष वा सोभन्दा माथिका नागरिकलाई लक्षित गरी खोप अभियान सञ्चालन गरिएको हो।
