धनगढी । । नेकपा एमालेले सुदूरपश्चिम प्रदेशसभामा बजेट पारित गर्ने बैठक बहिष्कार गरेका दुई सांसदलाई स्पष्टीकरण सोधेको छ ।
बैठकमा अनुपस्थित भएका पूर्वमन्त्री वीरबहादुर थापा र सामाजिक विकास समिति सभापति पाठकलाई एमालेले ४८ घण्टे स्पष्टीकरण सोधेको स्रोतले जनाएको छ।
प्रदेशसभामा प्रस्तुत बजेट मंगलबार पारित गर्ने कार्यसूची थियो । एमालेले आफ्ना सांसदलाई बैठकमा अनिवार्य उपस्थित हुन, बजेटको पक्षमा मतदान गर्न र तटस्थ नबस्न ह्विप जारी गरेको थियो ।
त्यस्तै,सामाजिक विकास समिति सभापति पाठकलाई पदबाट फिर्ता बोलाउने निर्णय गरेको छ । पाठकलाई समिति सभापतिबाट झिकिएको पत्र सभामुख भीमबहादुर भण्डारीसमक्ष पुगिसकेको जनाइएको छ ।
पाठकले बजेटको पक्षमा मतदान गर्न ह्विप जारी गर्ने एमाले संसदीय दलको बैठकसमेत बहिष्कार गरेका थिए। थापा भने प्रदेशसभा बैठकमा उपस्थित भए पनि हाजिर गरेका थिएनन् ।
मंगलबार विवादका बीच बजेट पारित भएपछि थापाले प्रदेशसभा बैठक बहिष्कार गर्नुका साथै प्रदेशसभा सदस्य पदबाट राजीनामासमेत दिएका छन् ।
