धनगढी। कञ्चनपुरमा भन्सार छली गरी भारतबाट ल्याइएका सामानसहित तीन जनालाई प्रहरीले पक्राउ गरेको छ। प्रहरीले अवैध लागूऔषधसहित एक जनालाई नियन्त्रणमा लिनुका साथै अदालतबाट सजाय तोकिएका दुई जना फरार प्रतिवादीलाई समेत पक्राउ गरेको छ।
जिल्ला प्रहरी कार्यालय कञ्चनपुरका अनुसार भीमदत्त नगरपालिका–१८ भगतपुरबाट भारतबाट भन्सार छली गरी ल्याइएका करिब २ लाख ५७ हजार २०० रुपैयाँ बराबरका मोटरसाइकलका चेन स्प्रोकेट, ब्रेक सुज, एलुमिनियम झिल्ली लगायतका सामान बरामद गरिएको हो। उक्त सामान ओसारपसारमा प्रयोग गरिएका दुई मोटरसाइकलसहित तीन जनालाई पक्राउ गरिएको प्रहरीले जनाएको छ।
त्यसैगरी, भीमदत्त नगरपालिका–११ भुजेलाबाट भारतबाट भन्सार छली गरी ल्याइएका करिब १ लाख २६ हजार ३२५ रुपैयाँ बराबरका चप्पल, साडी तथा किराना सामान प्रहरीले बरामद गरेको छ। बरामद सामान बेवारिसे अवस्थामा फेला परेको र आवश्यक प्रक्रिया पूरा गरी नियन्त्रणमा लिइएको प्रहरीले जनाएको छ।
