धनगढी । सुदूरपश्चिम प्रदेशमा एक महिनामा चालु मुद्धाका तीन सय ५० जनालाई पक्राउ गरि कानुनी दायरामा ल्याएको छ । गत असोजमा दर्ता भएका विभिन्न प्रकृतिका अपराध मुद्दाका प्रतिवादी पक्राउ गरेको हो ।
प्रदेशभरी असोजमा तीन सय २० अपराधका मुद्दा दर्ता भएका र अझै ६८ प्रतिवादी पक्राउ गर्न बाँकी रहेका सुदूरपश्चिम प्रदेश प्रहरी कार्यालय धनगढीले जनाएको छ ।
गत असोज महिनामा प्रदेशभरी दर्ता भएका अपराधका मुद्दामध्ये सामाजिक अपराधका ४४ वटा,संगठित तथा आर्थिक अपराधका ११,महिला तथा बालबालिका सम्बन्धी अपराधका २७,ज्यानसम्बन्धी ६१,आत्महत्यासम्बन्धी ५१,चोरीसम्बन्धीका २०,अन्य ९१ र सवारी ज्यानसम्बन्धी १५ वटा मुद्दा रहेका सुदूरपश्चिम प्रदेश प्रहरी कार्यालय धनगढीका प्रवक्ता प्रहरी वरिष्ठ उपरीक्षक पदमबहादुर बिष्टले जानकारी दिए ।
सोे अवधिमा जघन्य तथा गम्भीर अपराधतर्फ कर्तव्यज्यानका ४ र हातहतियारसम्बन्धी १,आर्थिक अपराधतर्फ बैंकिङ कसुरका २९,जुवाताससम्बन्धी ८ र ठगीसम्बन्धीका ९ वटा तथा महिला बालबालिका तथा ज्येष्ठ नागरिकसम्बन्धी २७ वटा मुद्दा दर्ता भएका उनले जानकारी दिए ।
त्यस्तै,अदालतको फैसला कार्यान्वयनअन्तरगत विभिन्न मुद्दामा फरार रहेका ८२ जनालाई पक्राउ गरिएका,उनीहरुलाई ३४ वर्ष ७ महिना २२ दिन कैद भुक्तानका लागि पठाइनुका साथै रु ४७ लाख ५ हजार ७७७ जरिवाना असुल गरिएको प्रहरीले जनाएको छ ।
त्यस्तै,प्रदेशका विभिन्न जिल्लामा एक महिनामा भएका २ सय ३५ सवारी दुर्घटनामा १२ जनाको मृत्यु भएको र ३ सय ६३ जना घाइते भएका सुदूरपश्चिम प्रदेश प्रहरी कार्यालयले जनाएको छ ।
उक्त दुर्घटनामध्ये चालकका कारण २०८,सवारीसाधनका कारण ९,यात्रुका कारण १,मादक पदार्थ सेवनका कारण ६,पैदाल यात्रुका कारण २,सडकका कारण ४ र चौपायाका कारण ५ वटा दुर्घटना भएको जनाइएको छ ।
