धनगढी- कैलाली निर्वाचन क्षेत्र नम्बर ५ ‘ख’ का स्वतन्त्र उम्मेदवार क्षितिज भण्डारीले आफ्नो ३० वर्ष लामो राजनीतिक जीवनमा कहिल्यै लाभको पदमा नपुगेको बताएका छन् । धनगढी उपमहागनरपालिका–१ मा बुधबार घरदैलो तथा टोलसभामा बोल्दै उनले यस्तो बताएका हुन् ।
आफू वडा सदस्य पदमासमेत नबसेको भन्दै उनले यसपटक प्रदेशसभा सदस्यमा स्वतन्त्र उम्मेदवार बनेर आएको बताए । यही क्षेत्रमा जन्मे हुर्केको स्थानीय उम्मेदवार भएकाले आफू क्षेत्रका समस्याका बारेमा जानकारसमेत रहेको उनले बताए ।
अरु जस्तो हावादारी गफ दिएर मत तान्ने मनसाय आफ्नो रहेको भन्दै उनले भने, ‘मैले यहाँका नागरिकका साना–सानालाई पनि बुझेको छ । यहाँका समस्या नै मेरा एजेण्डा हुन् ।’ विगतदेखि सामाजिक क्रियाकलापमा पनि सक्रिय रहँदै आएको सुनाउँदै उनले आफूलाई जिताएर पठाए यहाँका जनतालाई फाइदा नै हुने बताए ।
सरकारको कुनै सेवा सुविधा नै नलिएर जनताको विशुद्ध सेवाका लागि आफू खटिने उनले प्रतिबद्धता जनाए । चुनाव चिन्ह केरा लिएर उनी अहिले चुनावी प्रचारमा सक्रिय छन् ।
