काठमाडौं – डा. भोला रिजालका छोरा डा. कपिल रिजाल निर्देशित पहिलो फिल्म ‘ह्यारी कि प्यारी’को ट्रेलर सार्वजनिक भएको छ । आइतबार राजधानीमा एक कार्यक्रमका बीच सार्वजनिक गरिएको ट्रेलरमा हाँसो र रोदनको दुईटा पाटोलाई देखाइएको छ । पैसाको पछाडि भागिरहेका जितु नेपालको साम्राज्ञी आरएल शाहसँग भेट पश्चात् आउने असोचनीय उतार-चढावलाई ट्रेलरमा प्रस्तुत गरिएको छ ।
जितु पैसाका लागि आमाको जग्गा समेत बेच्न कसिएका छन् । तर, आमाले बिहे नगरेसम्म जग्गा बेच्न नमिल्ने कागजपत्र बनाएपछि जितु एक विज्ञापन पढेर पैसा कमाउन काठमाडौं झर्छन् । उता साम्राज्ञी जितुको पैसाप्रति आशक्ति देखेपछि प्रलोभन देखाउँछिन् । उनीहरुबीच बिहे पनि हुन्छ । तर, बिहेकै दिनबाट घटनाक्रम बदलिन्छ । फिल्मप्रति कौहुलता जगाउन सक्ने ल्याकत ट्रेलरमा छ ।
बिआर प्रोडक्सनको प्रस्तुतिमा निर्माण भएको फिल्ममा जितु र साम्राज्ञीसँगै विजय बराल, लक्ष्मी गिरी, सुवास गजुरेल, नरेश पौडेल, रञ्जना भट्टराई, समिक्षा पौडेल, रमेश अधिकारी, डिल्लीराम खनाललगायतको पनि अभिनय छ । फिल्मको प्रस्तुतकर्ता निर्देशक रिजाल स्वयं हुन् । फिल्मको ‘धरहरा हल्लियो’ गीतमा अभिनेत्री रेखा थापाले नृत्य गरेकी छन् ।
आगामी माघ २० गतेबाट प्रदर्शनमा आउन लागेको फिल्म पारिवारिक कथावस्तुमा निर्माण भएको निर्देशक रिजाल बताउँछन् ।
