काठमाडौं- वाग्मती प्रदेशमाथि ३३ रनको जित निकाल्दै सुदूरपश्चिम प्रदेशले प्रधानमन्त्री कप महिला राष्ट्रिय टी–२० क्रिकेट प्रतियोगितामा सुखद सुरुवात गरेको छ ।
सुनसरीको इटहरीमा आजदेखि सुरु भएको प्रतियोगितामा सुदूरपश्चिमले प्रस्तुत गरेको १२८ रनको लक्ष्य पछ्याउने क्रममा वाग्मतीले निर्धारित २० ओभरमा सात विकेट गुमाएर ९४ रनमात्र बनाउन सक्यो ।
वाग्मतीकी कञ्चन श्रेष्ठले १६ रन बनाइन् । यस्तै, सोनी पाख्रिनले १५, खुशी डंगोलले १४ र कप्तान अस्मिना कर्माचार्यले १३ रन जोडिन् । सुदूरपश्चिमका मनिषा चौधरी र रितु कनौजियाले समान दुई विकेट लिए । यसबाहेक, ईश्वरी बिष्टको नाममा एक विकेट रह्यो ।
यसअघि, कविता कुँवरले अर्धशतक प्रहार गरेपछि टस हारेर ब्याटिङको निम्तो पाएको सुदूरपश्चिमले निर्धारित २० ओभरमा पाँच विकेट गुमाएर १२७ रनको योगफल खडा गरेको थियो ।
कविताले ५२ बलमा ६ चौका र एक छक्कासहित ५० रन बनाइन् । रितु कनौजियाले अविजित २७ रन जोड्दा कप्तान विन्दु रावल र सम्झना खड्काले समान १० रन थपे ।
वाग्मतीकी अस्मिना कर्माचार्यले दुई विकेट लिइन् । यस्तै, यसु पान्डे, खुशी डंगोल र मनिषा उपाध्यायले समान एक विकेट हात पारे ।
जितसँगै दुई अंक जोडेको सुदूरपश्चिम समूह ‘ए’को शीर्ष स्थानमा उक्लिएको छ । आजदेखि सुरु भएको प्रतियोगितामा नेपाल पुलिस क्लब, सुदूरपश्चिम प्रदेश, वाग्मती प्रदेश, गण्डकी प्रदेश, प्रदेश–१, कर्णाली प्रदेश, लुम्बिनी प्रदेश र मधेस प्रदेश गरी कूल आठ टिमको सहभागिता छ । सहभागी आठ टिम दुई समूहमा विभाजित छन् ।
