एजेन्सी । लगातार शारीरिक व्यायाम गर्नुहुन्छ र पनि तपाईंको तौल बढिरहेको छ भने त चिन्ता लाग्छ नै । तर यसमा चिन्ता लिनुको सट्टा यस्तो किन भइरहेको छ भनेर जान्ने कोसिस गर्नुभयो भने फाइदा हुन्छ ।
शारीरिक व्यायाम गरेर पसिना बगाउँदा शरीरको केही क्यालोरी त घट्छ । तर पनि तपाईंको तौल घटिरहेको छैन भने आज हामी त्यसको पछाडिको कारण बताउने छौं ।
मसल्स बढ्नु
जब तपाईं व्यायाम गर्न सुरु गर्नुहुन्छ तब मसल्स बढ्ने सम्भावना धेरै हुन्छ । तपाईं कति मसल्स बढाउनुहुन्छ त्यो भने तपाईंको व्यायाम र खानपानमा भर पर्छ ।
जब तपाईं स्ट्रेन्थट्रेनिंङ व्यायाम गर्नुहुन्छ र पर्याप्त मात्रामा प्रोटिनको सेवन गर्नुहुन्छ भने अवश्य तपाईंको मसल्स बढ्न थाल्छ । तपाईंको शरीरमा बोसो कम भइरहेको हुन्छ र मसल्स बढिरहेको हुन्छ । यो एकदमै सकारात्मक संकेत हो ।
सप्लीमेन्टको सेवन गर्नु
यदि तपाईं व्यायाम गरिरहँदा पनि तौल बढिरहेको पाउनुहुन्छ भने हुन सक्छ तपाईंले व्यायामपछिको खानामा सप्लीमेन्टको सेवन गरिरहेको हुनुपर्छ । जसकारण केही मात्रामा तौल बढ्ने सम्भावना हुन्छ ।
कसरतपछि लिइने सप्लीमेन्टमा कार्बोहाइड्रेट हुन्छ । काब्र्सले मसल्सको ग्लाइकोजनसँग पानीलाई रिस्टोर गर्ने काम गर्छ । यो एउटा सामान्य तथा स्वस्थकर प्रक्रिया हो ।
त्यसैले यसमा डराउनुपर्ने आवश्यकता छैन । तर कुनै पनि सप्लीमेन्ट डाक्टरको सल्लाहबिना लिनु हुँदैन ।
खाना धेरै खानु
यो एउटा साधारण गल्ती हो जो धेरैले गर्दछन् । कतिपय व्यक्ति व्यायाम तथा कसरत त गर्छन् तर खाना पनि झन् धेरै खान्छन् ।
हामीलाई लाग्छ कसरत गरेर क्यालोरी बर्न गरेका छौं, अलिकति धेरै खाँदा केही फरक पर्दैन । तर यही सोंच नै तौल बढ्ने एउटा मुख्य कारण हुन्छ ।
त्यसैले कसरतसँगै खानामा पनि अनुशासन ल्याउन एकदमै आवश्यक हुन्छ । तपाईंले जति धेरै मेहनत गरेर क्यालोरी बर्न गर्नुभएको हुन्छ त्यो भन्दा छिटो दोब्बर क्यालोरी लिइरहनु भएको हुन्छ ।
