धनगढी- राष्ट्रिय समावेशी म्युजिक अवार्ड (निम अवार्ड २०२३) तर्फ ‘लिलु’ उत्कृष्ट भएको छ । सुदूरपश्चिम र कर्णाली प्रदेशको कुप्रथाका रूपमा रहेको छाउपडी प्रथा माथि बनेको देउडा गीत ‘लिलु’ उत्कृष्ट भएको हो । साँफेबगर नगरपालिकाका प्रमुख प्रशासकीय अधिकृत, स्रष्टा लक्ष्मीप्रसाद शर्मा र गौरव गिरीको शब्दमा रहेको ‘लिलु’ देउडा गीत सबैभन्दा बढी भोट प्राप्त गरेर उत्कृष्ट बनेको छ ।

नेपाली हुनमा गर्व गरौँ भाषा र संस्कृतिको जगेर्ना गरौँ” भन्ने मूल नाराका साथ ६ वर्ष देखि आयोजना हुँदै आएको राष्ट्रिय समावेशी म्युजिक अवार्ड (निम अवार्ड २०२३) मा संघिय मामिला तथा सामान्य प्रशासन मन्त्री अमनलाल मोदीले लिलुका रचनाकार शर्मालाई सम्मान गरेका हुन् ।

नेपालमा बोलिने विभिन्न भाषाभाषिमा बनेका गीत सङ्गीत तथा भिडियोहरूका कलाकारहरूको बृहत् सहभागितामा आयोजना भएको अवार्ड कार्यक्रममा ४२ विधामा अवार्ड प्रदान गरिएको छ । ४२ विधामा प्रतिस्पर्धा रहेका कलाकार, स्रष्टा तथा सर्जकहरूलाई अनलाइन भोटिङ प्रक्रिया र निर्णायकहरूको मतको आधारमा सर्वोत्कृष्ट घोषणा गरी अवार्ड प्रदान गरिएको हो ।

लिलु गीतमा सुदूर तथा मध्यपश्चिममा व्याप्त रहेको छाउपडीको विषयवस्तुलाई समेटिएको छ। महिनावारी भएपछि छाउगोठमा राख्नेदेखि उनीहरूले भोग्नुपरेका समस्या र त्यसबाट घट्ने अप्रिय घटनाहरूलाई भिडियोमार्फत देखाइएको छ। सुदूरपश्चिमका जिल्लामा अहिले पनि छाउपडी प्रथा देखिएकै कारण गीत–सङ्गीतबाट भए पनि सन्देश प्रवाह गर्नुपर्छ भन्ने उद्देश्यले तयार भएको लिलु उत्कृष्ट भएकोमा एलपि शर्माले खुसी व्यक्त गरे ।

लिलुको हालसम्मको सफलताका लागि सवैमा आभार प्रकट गर्दै उनले आगामी दिनमा पनि समाजको यथार्थता बिम्बित गर्ने अन्य कोसेलीहरू दर्शक तथा श्रोताहरूको माझ पस्किने उद्घोष गर्नुभएको छ । पहिलो प्रस्तुति उत्कृष्ट बनेकाले कला क्षेत्रमा लाग्नको लागि थप हौसला प्रदान गरेको बताए ।

निम अवार्ड कार्यक्रममा सहभागी साँफेबगर नगरपालिकाका प्रमुख राजेन्द्र कुँवरले सामाजिक कुरीति विरुद्ध बनेको गीत उत्कृष्ट बन्न सफल भएकोमा रचनाकार एलपी शर्मालाई बधाई दिए । उनले गीत सङ्गीतका माध्यमबाट रचनाकारहरूको सामाजिक रूपान्तरणमा ठुलो भूमिका रहेको पनि धारणा व्यक्त गरे । गीतमा छाउपडी प्रथाविरुद्धको सन्देश राम्रोसँग प्रवाह भएको छ । यो गीतले समाज परिवर्तनमा भूमिका खेलेको पनि नगर प्रमुख कुँवरको भनाई छ ।

एचबीएन किस्मतको सङ्गीत संयोजन रहेको गीतमा रोहित देउवाले सङ्गीत भरेका छन् । देउवाका साथै गीतमा देउडा गायिका रेखा जोशी, गौरी भट्ट र पूजा देवकोटाको स्वर सुन्न सकिन्छ। गिरीको निर्देशन रहेको गीतको भिडियोमा पूजा देवकोटा, रोशनी कार्की, एलपी शर्मा, भद्र जङ्ग कुँवर, मुकेश सुनार लगायतका कलाकारहरूको अभिनय रहेको छ।