काठमाडौं- बुद्ध एयरका प्रवन्ध निर्देशक वीरेन्द्रबहादुर बस्नेतले सञ्चालन गरेको आरजु राइस मिलको चामल बिहीबारदेखि बजारमा आएको छ । बिहीबार काठमाडौंमा पत्रकार सम्मेलन गर्दै राइस मिलले उत्पादन गरको लङ्ग्रेनका चामल सार्वजनिक गरेको हो ।
मिलका सञ्चालक वीरेन्द्रबहादुर बस्नेतले किसानले उत्पादन गरेको धानको न्यूनतम मूल्य तोकी धान प्राप्त भएको दुई दिनमा नै रकम भुक्तानी गर्ने बताए । उनले विगत दुई दशकदेखि खेतीकिसानीलाई सहयोग गर्दै आएको बताए । उनले किसान र उपभोक्ताबीचको दूरी नजिक बनाउनका लागि राइस मिलले काम गरेको जनाए । उनले राइस मिलमा निफन्नेदेखि, सुकाई र भण्डारसम्म रहेको बताए ।
उनले मिलले दुई सिजनमा १० करोड रुपैयाँसम्म किसानलाई भुक्तानी गरेको बताए । उनले अहिले ४ हजार विघाका किसानहरु आवद्ध भएको र अझ बढ्ने क्रम रहेको जानकारी दिए। उनले मिलले नेपाली किसानभन्दा अन्य किसानको धान खरिद नगर्ने उल्लेख गरे । उनले अबको खेतीकिसानी निर्वाहमुखी नभएर व्यवसायीकरण र आम्दानीमुखी बनाउन मिलले योगदान गर्ने दाबी गरे ।
उनले नेपालमा उत्पादन भएको उत्कृष्ट लामो रामधानलाई प्रशोधन गरेर लङ्ग्रेन चामल बजारमा ल्याएको जनाए । बस्नेतले हाल बजारमा रहेको लङग्रेन चामलको तुलनामा कम कनिकारहित र स्वादिलो रहेको बताए । उनले आरजु लङग्रेन चामल काठमाडौंलगायतका बजारमा प्रतिकेजी १३० रुपैयाँमा आएको जनाए ।
उक्त कार्यक्रममा बोल्दै बाली विकास तथा जैविक विविधता संरक्षण केन्द्रका प्रमुख डा। रामकृष्ण श्रेष्ठले नेपालमा खाद्यबालीको उत्पादनमा कमी भइरहेको उल्लेख गर्दै अहिलेकै अवस्थामा कायम भए देशमा चरम खाद्य संकट उत्पन्न हुने दाबी गरे । उनले सरकारले समस्या समाधान गर्नको लागि विभिन्न प्रयासहरु गरिरहेको पनि बताए ।
