धनगढी । सुदूरपश्चिम प्रदेशमा एक महिनामा १ सय १० जना विभिन्न मुद्धाका फरार प्रतिवादी पक्राउ परेका छन् ।
प्रहरीले अदालतको फैसला कार्यान्वयनको सिलसिलामा गत असारमा प्रदेशका विभिन्न जिल्लाबाट उनीहरुलाई पक्राउ गरेको हो ।
सुदूरपश्चिम प्रदेश प्रहरी कार्यालय धनगढीका प्रवक्ता प्रहरी वरिष्ठ उपरीक्षक पदमबहादुर बिष्टका अनुसार उनीहरु पक्राउ परेसँगै ८८ वर्ष ५ महिना १६ दिन कैद सजाय कार्यान्वयनमा आएको छ ।
पक्राउ परेका उनीहरुबाट रु ४३ लाख ९८ हजार ५५८ जरिवाना असुलउपर गरिएको छ । त्यस्तै, सोही अवधिमा प्रदेशभरी ४०३ चालु मुद्धाका ४१८ जना फरार प्रतिवादी पक्राउ गरिएको तथा ६१ जना फरार रहेको उनले जानकारी दिए ।
त्यस्तै,सो एक महिनाको अवधिमा गम्भीर तथा जघन्य अपराधतर्फ कर्तव्य ज्यानका ५,हातहतियारका १,मानव बेचबिखनका ६,आर्थिक अपराधका घटनातर्फ बैंकिङ कसुरका २९,जुवतास ६,ठगीका ६ र महिला,बालबालिका तथा ज्येष्ठ नागरिकसँगै सम्बन्धी ३८ मुद्धा दर्ता भएको सुदूरपश्चिम प्रदेश प्रहरी कार्यालयले जनाएको छ ।
त्यस्तै,प्रदेशभरी एक महिनामा ५६ जनाले आत्महत्या गरेको सुदूरपश्चिम प्रदेश कार्यालयको तथ्यांक छ । आत्महत्या गर्नेमा ३७ पुरुष,आठ महिला,६ बालक र ५ बालिका रहेको प्रहरीले जनाएको छ ।
आत्महत्या गर्नेमध्ये ४४ जनाले झुन्डिएर,११ जनाले बिष सेवन गरेर,१ जना अन्य रहेको सुदूरपश्चिम प्रदेश प्रहरीको तथ्यांकमा उल्लेख छ ।
त्यस्तै,सुदूरपश्चिमका विभिन्न जिल्लाबाट १ करोड २० लाख ८८ हजार ४० बराबरका अवैध भन्सार छलीका सामानहरु नियन्त्रणमा लिएको जनाइएको छ । साथै अवैध भन्सार छली संलग्न ४ जनालाई नियन्त्रणमा लिइएको प्रहरीले जनाएको छ ।
