धनगढी । सुदूरपश्चिम प्रदेशको राजधानी धनगढीमा प्रदेशकै पहिलो पाँचतारे होटल सञ्चालनमा आएको छ । क्लब चौलानी लिमिटेडले करिब तीन अर्ब रुपैयाँको लागतमा निर्माण गरिरहेको होटलको पहिलो चरणमा ३० वटा कोठाबाट सेवा सुरु गरेको हो ।
क्लब चौलानीका प्रबन्ध निर्देशक मानसिंह साउँदका अनुसार होटल पूर्ण क्षमतामा सञ्चालनमा आएपछि कुल ११५ वटा कोठा हुनेछन् । हाल सञ्चालनमा रहेका कोठाको भाडादर ६ हजारदेखि १२ हजार रुपैयाँसम्म निर्धारण गरिएको छ ।
अन्तर्राष्ट्रिय होटल चेन आईएचजीअन्तर्गतको ‘होलिडे इन’सँग सहकार्य गरिएको होटलमा पहिलो चरणमा रेस्टुरेन्ट, फिटनेस सेन्टर, कफी सप र पार्किङलगायतका सुविधा उपलब्ध गराइएको छ ।
होटलको दोस्रो चरणमा प्रेसिडेन्सियल सुइटसहित थप ८५ वटा कोठा निर्माण गरिनेछ । त्यससँगै स्विमिङ पुल, साउना, स्टिम, ज्याकुजी, स्पा, रूफटप रेस्टुरेन्ट, क्यासिनो, करिब ७०० जना क्षमताको बैंक्वेट हल र अल डे डाइनिङ रेस्टुरेन्टलगायतका सुविधा थप गर्ने योजना रहेको साउँदले बताए ।
उनका अनुसार दोस्रो चरणअन्तर्गतका निर्माण कार्य अहिले धमाधम भइरहेका छन् । दोस्रो चरणको निर्माणसँगै होटलको आन्तरिक सजावटमा सुदूरपश्चिमको कला, संस्कृति र मौलिक पहिचान झल्काउने तयारीसमेत गरिएको छ ।
दोस्रो चरणको काम सम्पन्न भएपछि होटल आईएचजीको व्यवस्थापनमा पूर्ण क्षमतासहित सञ्चालनमा आउने क्लब चौलानीले जनाएको छ ।
अन्तर्राष्ट्रिय ब्रान्डको व्यवस्थापनमा पाँचतारे होटल सञ्चालनमा आएपछि सुदूरपश्चिमको पर्यटन प्रवर्द्धनमा सहयोग पुग्ने अपेक्षा गरिएको छ । यसले प्रदेशमा आउने स्वदेशी तथा विदेशी पर्यटकलाई स्तरीय सेवा उपलब्ध गराउनुका साथै व्यावसायिक तथा पर्यटकीय गतिविधि विस्तारमा समेत योगदान पुर्याउने होटल सञ्चालकको विश्वास छ ।
