धनगढी । कैलालीको धनगढीस्थित चैतन्य पाठशालाले ‘फुटबल फर स्कूल : रोड टु वर्ल्ड कप’ कार्यक्रमअन्तर्गत चैतन्य पाठशाला अन्तर विद्यालय जिल्लास्तरीय फुटबल प्रतियोगिता गर्ने भएको छ । प्रतियोगिता आगामी मंसिर २५ गतेदेखि पुस ८ गतेसम्म धनगढी रंगशालामा सञ्चालन हुनेछ ।
पाठशालाले आज पत्रकार सम्मेलनको आयोजना गर्दै प्रतियोगिताका बारेमा जानकारी गराएको हो । पत्रकार सम्मेलनमा बोल्दै पाठशालाका अध्यक्ष गणेशप्रसाद जोशी बालबालिकामा फुटबल खेलप्रतिको रुचि अभिवृद्धि गर्ने, प्रतिभावान खेलाडीको पहिचान गर्ने तथा विद्यालयस्तरबाटै फुटबल खेलको विकास र प्रवद्र्धन गर्ने उद्देश्यले प्रतियोगिता आयोजना गर्न लागिएको बताए ।
त्यस्तै, कैलाली जिल्ला फुटबल संघ र चैतन्य पाठशालाबीच १४ वर्षमुनिका छात्रछात्राको जिल्लास्तरीय फुटबल प्रतियोगिता सञ्चालन गर्ने सम्बन्धमा सम्झौतापत्रमा हस्ताक्षर गरिएको छ ।
सम्झौतामा पत्रमा पाठशालाका तर्फबाट प्रार्चाय प्रेमनिधि ओझा र संघका अध्यक्ष अनिल मल्लले हस्ताक्षर गरेका छन् ।
संघ र चैतन्य पाठशालाबीचको यस सहकार्यले जिल्लामा विद्यालयस्तरीय फुटबलको विकास तथा छात्रछात्राको खेल सहभागिता अभिवृद्धिमा थप टेवा पुग्ने विश्वास लिइएको छ ।
प्रतियोगितामा छात्र र छात्राको १६/१६ टिमको सहभागिता रहनेछ । यस्तै, हरेक टिममा अतिरिक्त खेलाडीसहित २० जना र टिमको प्रशिक्षक, व्यवस्थापक तथा फिजोयो गरेर एक टिममा खेलाडीसहित २३ जना रहनेछन आयोजकले जनाएको छ ।
प्रतियोगितामा ३२ टिमका अफिसियलसहित ७३६ जना प्रत्यक्ष सहभागी हुनेछन् भने अन्य प्राविधिक र व्यवस्थापनतर्फ गरेर ७५० जना भन्दा बढी खेलाडी, अफिसियल र रेफ्रीहरूको सहभागिता रहनेछ ।
प्रतियोगितामा प्रथम हुने टिमले नगद रु एक लाख र द्वितीय हुने टिमले नगद रु ५० हजार पुरस्कार प्राप्त गर्ने जनाइएको छ । साथै विजेता तथा उपविजेता टिमलाई ट्रफी, मेडल तथा प्रमाणपत्र प्रदान गरिनेछ ।
