धनगढी- सुदूरपश्चिम प्रदेशका मुख्यमन्त्री कमलबहादुर शाहले धनगढीमा रहेको सौभाग्य हस्पिटल तथा रिसर्च सेन्टर प्रालिको उद्घाटन गरेका छन् । कैलालीको धनगढी उपमहानगरपालिका–२ मा रहेको सौभाग्य हस्पिटलको मुुख्यमन्त्री शाहले शनिबार एक कार्यक्रमका बीच उद्घाटन गरेका हुन् । उद्घाटन कार्यक्रममा बोल्दै मुख्यमन्त्री शाहले स्वास्थ्य क्षेत्रमा निजी क्षेत्रसँग सहकार्य गरेर अघि बढ्ने बताए ।
‘प्रदेश सरकार विशेष गरी स्वास्थ्य क्षेत्रमा निजी क्षेत्रसँग सहकार्य गरेर अघि बढ्न चाहान्छ’ मुख्यमन्त्री शाहले भने ‘स्वास्थ्य क्षेत्रमा तपाईँहरु अगाडि बढ्नुस् हामी तपाईँलाई साथ दिन तयार छौँ’ ।
‘अहिले प्रविधीले विश्वमा एक किसिमको वातावरण सिर्जना गरेको छ,नयाँ नयाँ प्रविधि छ,नयाँ नयाँ साधनश्रोत छन्’ उनले भने ‘सबै कुरा हुँदा हुँदै पनि हामीले अझैँ पनि राष्ट्रिय अन्तर्राष्ट्रिय क्षेत्रमा जुन स्वास्थ्य सेवा पाउने गरेका छौँ त्यो सेवाबाट कताकता वञ्चित भएको जस्तो पनि लाग्छ’ ।
उनले भने ‘राज्यले महत्व दिँदादिँदै पनि राज्य त्यहाँ पुग्न नसकेको अवस्था पनि छ त्यसकारण त्यतातिर सबैले मनन गरेर हामी सबै एकजुट भएर अगाडि बढ्नु पर्ने हुन्छ, त्यसका लागि हामी तयार छौँ’ ।
२०७९ फागुन १५ गतेदेखि सेवा सुरु गरेको हस्पिटल करीब १२ करोड लगानीमा सञ्चालनमा ल्याइएको हस्पिटलका अध्यक्ष दिनेशराज जैसीले जानकारी दिए । हाल २५ शय्याको हस्पिटलका रुपमा सञ्चालन गरिएको र १ सय शय्याको बनाउने प्रक्रियामा रहेको उनले बताए ।
हस्पिटलले असार २५ गतेबाट १५ दिने निःशुल्क रगत जाँचसहित विशेषज्ञ डाक्टरद्वारा निशुल्क परामर्श तथा उपचार सेवा पनि सुरु गरेको जनाइएको छ । जसमा औषधिमा १० र ल्याव सेवा २० प्रतिशत छुट रहेको हस्पिटलले जनाएको छ । धनगढी उपमहानगरपालिका–२ स्थित सौभाग्य हस्पिटलले २०७९ फागुन १५ गतेदेखि सेवा सुरु गरेको थियो ।
