बझाङ- जिल्लाको बुङ्गल नगरपालिका लगायत धेरैठाउँहरुमा खाना पकाउने एलपी ग्याँसको अभाव देखिएको छ । साउन देखिनै लगातार आएको अविरल वर्षाका कारण गएको बाढी र पहिरोले बागथला, विजगडा सडक अवरुद्ध भएपछि यातायातका साधन चल्न सकेका छैनन्। यातायातका साधान चल्न नसक्दा बजारमा दैनिक प्रयोग हुने खाना पकाउने एलपी ग्याँस संगै उपभोग्य सामान, खाद्यवस्तुलगाएत तरकारीको पनि अभाव देखिएको हो ।
दैनिक उपभोग्य वस्तुहरूको समेत बजारमा चरम अभाव भए संगै सामानको मुल्य पनि अकाशिए पछि सर्वसाधारणहरू मर्कामा परेका छन् । स्थानीयले मुल्य भन्दा बढी रुपयाँ तिरेर पनि बजारमा दैनिक उपभोग्य समान पाइन छाडेको बताइएको छ ।
विजगडा बजारमा पसल संञ्चालन गर्दै आएका स्थानिय राम जाग्रीले आटा किन्न खोज्दा पनि नपाएको र बजारमा ग्याँस सिलिन्डरको पनि निकै अभाव भएको बताए । विजगडाकै अर्का व्यवसायी धन बहादुर धामीले पनि बजारमा खाना बनाउने ग्याँस पाउन छाडेपाछि दाउरा खोज्न गाउँतिर जानु पर्ने वाध्यता रहेको बताए ।
त्यस्तै अवरुद्ध सडक संञ्चालनमा आउन अझै समयलाग्ने देखिएकाले स्थानियहरु बढीनै पैसा तिरेर भएपनि खाद्यान्नको जोहो गर्न थालेका छन् ।बजारमा खाद्यान्न देखि दैनिक उपभोग्य सामान पाउन छाडेपछि व्यापारीहरुले भएका बस्तुहरु समेत लुकाएर महंगो मुल्यमा बिक्री गर्दै कालोबजारी गर्न थालेको स्थानीय आशिक ठकुरीले बताए । सडक बन्द भएको लगभग एकमहिना सम्म पनि सामान्य यातायात खुलाउन नसक्नुले स्थानीय सरकार गैरजिम्मेवार रहेको उनको भनाइ छ।
साथै बिजगडा बजारका कतिपय व्यवसायी भने दैनिक उपभोग्य वस्तु, खाद्यान्न, र ग्याँस सबैको अभाव देखिएपछि व्यवसाय नै बन्द गर्न थालेका छन् । बाढी पहिरोले सडक अवरुद्ध हुँदा बुंगलबासी मर्कामा परेका छन् ।
यस विषयमा बुंगल नगरपालिकाका प्रमुख जयबहादुर धामीले बागथला, बिजगडा सडक संञ्चालनको लागि यातायात कार्यालय, भौतिक पुर्वाधार कार्यालय र बागथला, बिजगडा कालोपत्रे गर्न ठेक्का पाएको के.एस. कन्ट्रक्सन संग पनि छिटो सडक सञ्चालन गर्न समन्वय गरिरहेकाले बताए ।
कालंगा हाइड्रोपावरको काम सकिएपछि स्थानीय सरकारलाई भने सडक शुचारु गर्न सकस परेको छ । बुङ्गल नगरपालिका जोड्ने बित्थड, देउलिकोट देखी बुङ्गल झपा हुँदै बिजगडा जोड्ने सडक पनि संञ्चालनमा ल्याउन सकिएको छैन् । निरन्तर पानी परिरहेकाले सडक सुचारु गर्न अझै समय लाग्ने बताइएको छ ।
