काठमाडौं- प्रथम प्रदेशस्तरीय शुक्लाफाँटा बुँदोकै–दो फुट कन्ट्याक्ट कराते च्याम्पियनसिप मंसिर २९ गतेदेखि सुरु हुने भएको छ ।शुक्लाफाँटा बुँदोकै–दो शाखाको आयोजनामा हुने प्रतियोगितामा महिला र पुरुषतर्फ गरी ११ विधामा प्रतिस्पर्धा हुने छ । प्रतियोगिताको पुरुषतर्फ २५, ३०, ३५, ४०, ४५, ५० र खुला गरी सात विधामा प्रतिस्पर्धा हुनेछ । यस्तै, महिलातर्फ ४०, ४५, ५० र खुला गरी चार विधामा प्रतिस्पर्धा हुनेछ ।
कञ्चनपुरको शुक्लाफाँटा नगरपालिकास्थित बंसा कभर्ड हलमा हुने प्रतियोगिता दुई दिनसम्म सञ्चालन हुनेछ । प्रतियोगितामा महिला र पुरुषगरी सुदूरपश्चिमका नौ जिल्लाका करिब ३०० जना खेलाडीले प्रतिस्पर्धा गर्ने आयोजकले बताएको छ । प्रतियोगिताको प्रत्येक तौल समूहका विजेताले पाँच हजार, उपविजेताले तीन हजार, तेस्रो हुनेले दुई हजार र चौथो हुनेले एक हजार रुपैयाँ पुरस्कार पाउनेछन् ।
प्रतियोगिताका लागि सबै तयारी पूरा भइसकेको प्रतियोगिताको संयोजक एवं मुख्य प्रशिक्षक लक्ष्मण बोहराले बताए । “प्रतियोगिताको सम्पूर्ण तयारी पूरा भइसकेको छ । यस प्रतियोगिताका लागि करिब १५ लाख रुपैयाँ खर्च हुने हाम्रो अनुमान छ । यसका लागि स्थानीय तहले सहयोग गरेका छन्,” प्रशिक्षक बोहराले भने ।
