काठमाडौँ- प्रधानमन्त्री कप क्रिकेट प्रतियोगिताअन्तर्गत भैरहवामा भएको खेलमा सुदूरपश्चिम प्रदेशले कर्णाली प्रदेशलाई २७८ रनको चुनौतीपूर्ण लक्ष्य दिएको छ । कर्णालीका कप्तान रविन्द्र शाहीले टस जितेर पहिला बलिङको निर्णय लिएका थिए ।
तर, सुदूरपश्चिममा खडक बोहोराले उत्कृष्ट ब्याटिङ गरेपछि उसले बलियो स्कोर खडा गरेको हो । बोहोराले ११४ बलमा ८० रन बनाए भने टेक रावतले ९१ बलमा ५९ रनको योगदान दिए ।
यस्तै किरण ठगुन्नाले विस्फोटक अन्दाजमा ३३ बलमा ५० रन बनाए । सुदूरपश्चिमले ५० ओभरमा ५ विकेट गुमाएर २७७ रन बनाएको हो । उता कर्णालीका लागि दिपेन्द्र रावत र युनिस सिंहले एक एक विकेट लिए । जारी प्रतियोगितामा दुवै टिमले यसअघि एक एक खेल जितेका छन् ।
