काठमाडौं- प्रधानमन्त्री कप पुरुष राष्ट्रिय क्रिकेट प्रतियोगितामा सुदूरपश्चिम प्रदेशले कर्णाली प्रदेशविरुद्ध १३४ रनको फराकिलो जित निकालेको छ । जारी प्रतियोगितामा सुदूरपश्चिमको यो लगातार दोस्रो जित हो ।
मंगलबार भैरहवास्थित सिद्धार्थ क्रिकेट मैदानमा सुदूरपश्चिमले प्रस्तुत गरेको २७८ रनको लक्ष्य पछ्याउने क्रममा कर्णालीले ३७।२ ओभरमा सबै विकेट गुमाएर १४३ रन मात्र जोड्न सक्यो ।
कर्णालीका दिवान पुनले ३८ रन बनाए । अर्जुन घर्तीले २४, दिनेश अधिकारीले २० र हिमान्सु शाहीले १७ रन जोडे । कर्णालीलाई सस्तैमा समेट्न सुदूरपश्चिमका शेर मल्लले चार विकेट लिए । १० ओभर बलिङ गरेका उनले ३५ रन मात्र खर्चिए । विकास आग्रीले दुई, भोजराज भट्ट र नारायण जोशीले समान एक विकेट लिए ।
त्यसअघि, तीन ब्याटरले अर्धशतक बनाएपछि टस हारेर ब्याटिङमा उत्रिएको सुदूरपश्चिमले निर्धारित ५० ओभरमा पाँच विकेट गुमाएर २७७ रनको योगफल खडा गरेको थियो ।
सुदूरपश्चिमका खडक बोहराले ११४ बलमा ६ चौकासहित ८० रनको योगदान गरे । टेक रावतले ५९, किरण ठगुन्नाले ५० रन जोडे । नारायण जोशीले ३१, कप्तान राजु रिजालले १९, नरेन भट्टले १५ रन थपे ।
कर्णालीका दिनेश अधिकारी, युनिस सिंह, प्रकाश जैशी र दीपेन्द्र रावतले समान एक विकेट लिए । जितसँगै दुई खेलबाट चार अंक जोडेको सुदूरपश्चिम तालिकाको दोस्रो स्थानमा उक्लिएको छ । समान खेलबाट दुई अंकको कर्णाली आठौँ स्थानमा छ ।
