काठमाडौँ- सुदूरपश्चिम प्रदेशले मैँयादेवि यु–१९ महिला राष्ट्रिय क्रिकेट प्रतियोगितामा पहिलो जित निकालेको छ । सुदूरपश्चिमले पहिलो जित निकाल्ने क्रममा कोशी प्रदेशलाई १९ रनले पराजित गरेको हो । चितवनको भरतपुरमा रहेको गौतम बुद्ध अन्तराष्ट्रिय क्रिकेट मैदानमा भएको खेलमा टस हारेर पहिला ब्याटिङ गरेको सुदूरपश्चिमले निर्धारित १५ ओभरमा तीन विकेट गुमाउँदै १०४ रन बनाएको थियो ।
सुदूरपश्चिमका लागि साबित्री धामीले अविजित ३३ तथा स्नेहा महराले अविजित २० रन बनाए । त्यस्तै ओपनर निलम पाण्डेले १६ र मनिषा बोहराले १० रनको योगदान गरे । कोशीका लागि निरा राजवंशी र रिया शर्माले एक एक विकेट लिए ।
सुदूरले दिएको १०५ रनको लक्ष्य पछ्याएको कोशीले निर्धारित १५ ओभरमा ६ विकेटको क्षतिमा ८५ रनमा समेटियो । कोशीका तीन खेलाडीले दोहोरो अंकको रन बनाउँदा अन्य खेलाडी सस्तैमा आउट भए । कोशीका रिया शर्माले अविजित २७ रन बनाइन् । त्यस्तै टिका शाहले २५ रनको योगदान गर्दा प्रतिभा मण्डल १० रनमा अविजित रहिन् ।
कोशीलाई सस्तैमा समेट्न स्नेहा महरा र अनु कठायतले समान दुई दुई विकेट लिए । त्यस्तै जानकी थापा र करिस्मा थापाले एक एक विकेट लिए । समुह ए मा रहेको गण्डकीले शतप्रतिशत जितका साथ चार अंक बनाउँदै समुहको शीर्ष स्थानमा रहेको छ । दोस्रो स्थानको सुदूरको दुई अंक रहेको छ । कोशीको पनि समान दुई अंक भएपनि नेट रनरेटमा पछि पर्दै तेस्रो स्थानमा रहेको छ । अंकविहिन मधेश प्रदेश चौथो स्थानमा रहेको छ ।
