बिहार- बिहारको लखीसराय जिल्लामा भयानक सडक दुर्घटनामा ९ जनाको मृत्यु भएको । बुधवार भएको दुर्घटनामा ५ जना गम्भीर घाइते भएका छन् । घाइतेहरुलाई थप उपचारका लागि पटना रिफर गरिएको छ । घटना रामगढ चोक पुलिस स्टेशन क्षेत्रको झालौना गाउँ नजिकै भएको हो ।
गलत साइडबाट तीव्र गतिमा आएको ट्रकले यात्रुले भरिएको टेम्पोलाई ठक्कर दिएको थियो । ठक्करका कारण आठ जनाको घटनास्थलमै मृत्यु भएको थियो । उपचारको क्रममा टेम्पो चालकको पनि मृत्यु भएको छ । दुर्घटनापछि सो क्षेत्रमा त्रास फैलिएको छ । नजिकै मानिसको भीडभाड थियो ।
दुघर्टनाको खबर आउने बित्तिकै प्रहरीले घटनास्थलमा पुगेर अनुसन्धान शुरु गरेको थियो । स्थानीय बासिन्दाको सहयोगमा प्रहरीले घाइतेलाई अस्पताल भर्ना गराएको थियो ।
प्रहरीका अनुसार टेम्पोमा सवार सबैजना सिकन्दरामा केटरिङको काम सकेर लखिसराई रेलवे स्टेसनतर्फ जाँदै थिए । उनीहरु रेल चढेर घर जाँदै थिए ।
सबै मृतकका आफन्तलाई घटनाबारे जानकारी गराइएको प्रहरीले जनाएको छ । ट्रक चालकको खोजी कार्य भइरहेको भारतीय प्रहरीले जनाएको छ । एजेन्सी
