विराटनगर- कोसी प्रदेश ट्रफी पेप्सी नेसनल राष्ट्रिय टी–२० क्रिकेट प्रतियोगिता विराटनगरको बैजनाथपुर क्रिकेट रंगशालामा सुरु भएको छ । मंगलबार भएको उद्घाटन खेलमा कोसी प्रदेश र सुदूरपश्चिमले विजयी सुरुवता गरेका छन् । पहिलो खेलमा कोसीले कर्णाली प्रदेशलाई ३८ रनले पराजित गको छ । टस जितेर ब्याटिङमा उत्रिएको घरेलु टोली कोसीले निर्धारित २० ओभरमा ८ विकेट गुमाएर १४० रनको योगफल बनाएको थियो ।

कोसीका लागि कप्तान अंकित सुवेदीले ३६ बलमा एक छक्का र ६ चौका प्रहार गरी ४६ रनको योगदान दिए । सुजन थपलियाले ३८ रन, समिर कार्कीले २० रन, दिपेश कँडेलले १४ रन जोडे ।

कर्णालीका अनुज चुनाराले २ विकेट लिँदा प्रकाश जोशी, युनिस ठकुरी, दिवान पुन, दिनेश अधिकारी र दिपेन्द्र रावतले समान १–१ विकेट लिए । १४१ रनको जवाफी ब्याटिङमा उत्रिएको कर्णालीले १८ दशमलव ३ बलमा सबै विकेट गुमाई १ सय २ रनमा जोड्न सक्यो । कर्णालीका हिमांशुु सुवेदीले सर्वाधिक ३४ रन जोड्दा दिनेश अधिकारीले ११ रन र दिवान पुनले १० रन जोडे ।

कोसीका म्यान अफ द म्याच दिपेश कँडेलले ३ विकेट लिँदा श्रवण यादवले पनि ३ विकेट लिए । त्यस्तै फिर्दोस अन्सारीले २ विकेट लिए ।दोस्रो खेलमा सुदूरपश्चिम प्रदेशले गण्डकी प्रदेशलाई ४० रनले पराजित गरेको छ । टस जितेर ब्याटिङ गरेको सुदुर पश्चिम प्रदेशले निर्धारित २० ओभरमा २ विकेट गुमाई १७२ रनको विशाल स्कोर खडा गरेको थियो ।

सुदूरपश्चिमका लागि म्यान अफ द म्याच नरेश भट्रले ४६ बलमा १ छक्का र ७ चौका प्रहार गरि ६२ रनमा अविजित हुँदा किरण ठगुनाले २० बलमा ५ छक्का र ३ चौका प्रहार गर्दै अविजित ५३ रन र खडक बोहोराले ४१ रन बनाए ।

गण्डकीका अमित गुरुङ र सन्दिप क्षेत्रीले १–१ विकेट लिए । जवाफमा १ सय ७३ को विजयी लक्ष्य पछ्याएको गण्डकीलले १७ दशमलव ४ बलमा सवै विकेट गुमाई १ सय ३२ रनमा सीमित भयो। गण्डकीका लागि दिपक डुम्रेले ३० बलमा १ छक्का र ६ चौका प्रहार गरी ४० रन बनाउँदा ईश्वर क्षेत्रीले १८ रन, समिर कँडेलले १४ रन, सन्दीप क्षेत्रीले १२ रन र गोविन्द विकले ११ रनको योगदान दिए ।

सुदूरपश्चिमका हेमन्त धामीले ३ विकेट लिँदा नारायण जोशी, शेर मल्ल र नरेन साउदले समान २–२ विकेट लिए । चैत ३ गतेसम्म सञ्चालन हुने प्रतियोगितामा सातै प्रदेश र तीन विभागिय टोली गरी १० टिम सहभागी रहेको मोरङ जिल्ला क्रिकेट संघका अध्यक्ष महमद सादबाबु कुरेसीले बताए । प्रतियोगिताका विजेताले ५ लाख रुपैयाँ र उपविजेताले ३ लाख रुपैया प्राप्त गर्नेछ । प्रतियोगिताका लागि करिब ७५ लाख रुपैया खर्च हुने उनको भनाइ छ । लिग कम नकआउटको आधारमा खेल हुने आयोजकले बताएको छ ।