धनगढी- कैलालीको धनगढीमा भईरहेको जय नेपाल कप २०८० अन्तर क्याम्पस प्रदेश स्तरीय क्रिकेट प्रतियोगितामा आज भएका खेलमा कैलालीको कैलाली बहुमुखी क्याम्पस र वहुमुखी क्याम्पस विजयी भएको छ ।
नेपाल विद्यार्थी संघ कैलालीको आयोजना र शिवपुरी युवा क्लबको प्राविधिक व्यवस्थापनमा भईरहेको प्रतियोगितामा आजको खेलमा सुदुरपश्चिमाञ्चल क्याम्पसमाथि जित हात पार्दै कैलाली बहुमुखी क्याम्पस सेमिफाईनल पुगेको छ ।
धनगढीको फाप्ला मैदानमा आज भएको एक मात्रै खेलमा कैलाली बुहुमुखी क्याम्पसले सुदुरपश्चिमाञ्चल क्याम्पसलाई २४ रनले पराजित गरेको छ । पहिले ब्याटिङ गर्दै कैलालीले निर्धारित २० ओभरमा ९ विकेट क्षतिमा एक सय २६ रनको योगफल बनायो ।
टीमका लागि सुशान्त कार्कीले २६ रन, दिपक कँडेलले २३ रन र रोशन रावलले १३ रन बनाए । सुदुरपश्चिमाञ्चलका लागि कुम्भ देउवाले ३ विकेट तथा सचिन मल्ल र पारस सुनारले दुई दुई विकेट लिए ।
एक सय २७ रनको लक्ष्य पछ्याएको सुदुरपश्चिमाञ्चल क्याम्पसले १९ दशमलव १ ओभरमा सबै विकेट क्षतिमा एक सय २ रनमा अलआउट भयो । टीमका लागि सचिन साउँदले ३८ रन, विजय रानाले २९ रन र कुम्भ देउवाले १२ रन बनाउनु बाहेक अन्य खेलाडीले दोहोरो रन अंक बनाउन सकेनन् ।
कैलाली बहुमुखी क्याम्पसका लागि पारस रोकायाले ४ विकेट हात पार्दा अभिषेक कुँवर र सुसिल बिष्टले दुई दुई विकेट लिए । खेलमा कैलाली बहुमुखी क्याम्पसका पारस रोकाया म्यान अफ द म्याच भए । उनले नगद दुई हजार सहित ट्रफी पाए ।
टी २० प्रतियोगिताको विजेताले तीन लाख र उपविजेताले एक लाख नगद सहित ट्रफी, मेडल र प्रमाणपत्र पाउने छन् । यस्तै प्रतियोगिताको सर्वोत्कृष्ट खेलाडीले नगद २५ हजार, उत्कृष्ट बलर र ब्याटरले जनही पन्ध्र हजार, उदयमान खेलाडीले नगद दश हजार र म्यान अफ द म्याचले जनही दुई हजार एवम् ट्रफी, मेडल र प्रमाणपत्र प्राप्त गर्ने छन् ।
