धनगढी- सुदूरपश्चिम प्रदेशका प्रहरी प्रमुख एवं प्रहरी नायव महानिरीक्षक रविन्द्र केसीले जिल्ला प्रहरी कार्यालय डडेल्धुराको स्थलगत निरीक्षण गरेका छन ।
निरीक्षणको क्रममा आज उनले कार्यालय भवन, सम्पूर्ण शाखाहरु, ब्यारेक,मेस तथा हिरासत कक्षको निरीक्षण गर्नुका साथै जिल्ला प्रहरी कार्यालय डडेल्धुरा तथा मातहतमा कार्यरत विभिन्न प्रहरी युनिटहरुका इन्चार्जहरुलाई आवश्यक निर्देशन समेत दिएको सुदूरपश्चिम प्रहरी कार्यालयले जानकारी दिएको छ ।
उनले अपराध अनुसन्धान तथा नियन्त्रण कार्यमा कुनै कसिमिको प्रभावमा नपरी काम गर्ने र गैर व्यवसायिक कृयाकलापमा संलग्न नहुन ,यदी कुनै प्रहरी कर्मचारी संलग्न भएको पाइए कार्बाही गरिने उनले बताए । फैसला कार्यान्वयन, पेण्डिङ मुद्दाको अनुसन्धान तथा फरार अपराधी पक्राउ कार्यलाई विशेष प्राथमिकताका साथ प्रभावकारी ढंगले अघि बढाउन र सीमावर्ती अपराध तथा तस्करी नियन्त्रणमा शुन्य सहनशीलताको नीति अपनाई उपलब्धीमुलक ढंगले कार्य गर्न पनि उनले अनुरोध गरे ।
अबैध काठ पक्राउ,नियम विपरीत नदीजन्य पदार्थको उत्खनन्, अतिक्रमित सरकारी जग्गा फिर्ता ल्याउने कार्यलाई तीब्रता दिने , गुण्डागर्दी, जुवातास लगायतका सामाजिक अपराध नियन्त्रणमा कडाइका साथ प्रस्तुत हुन पनि उनले प्रहरीलाई निर्देशन दिए । उनले लागूऔषध नियन्त्रण कार्यलाई महाअभियानको रुपमा सञ्चालन गर्न ,
प्रहरी आचरण विपरीतका कार्य नगर्न, नेपाल प्रहरीको मिडिया नीति विपरीत हुने गरी सामाजिक सञ्जाल प्रयोग नगर्न समेत अनुरोध गरे । नागरिकको मानव अधिकार सम्मान गर्न, नागरिक मैत्री व्यवहार गर्न,हिरासतमा रहेका थुनुवा ओसार पसारमा तथा अन्य कानुनी प्रक्रियामा समेत भरपर्दो सुरक्षा व्यवस्था मिलाउन कुनै कसर बाँकी नराख्न पनि उनले आग्रह गरे ।
उनले गैर व्यवसायिक आर्थिक लाभको लागि कसैसंग साँठगाँठ र मिलेमतो नगर्ने,कुनै प्रहरी कर्मचारीहरुले गरेको पाईएमा कानूनी दायरामा ल्याइने समेत बताए ।
व्यक्तिगत पीरमर्का गुनासाहरु निर्धारित मापदण्ड अनुरुप अघि बढाउन,समन्वयात्मक,सहभागितामुलक र जनमुखी प्रहरी सेवामा समर्पित रही उच्च अनुशासनका साथ कार्य गर्ने निर्देशन समेत दिए । साथै जिल्ला प्रहरी कार्यालयको नरीक्षण पश्चात जिल्ला सुरक्षा समितिको वैठकमा सहभागी भई जिल्लाको समग्र बस्तुस्थिति एवं सुरक्षाकर्मीहरुको परिचालनको बारेमा समेत जानकारी लिइ जिल्लास्थित सुरक्षा निकायका प्रमुखहरुलाई शान्ति सुरक्षा अमन चयन कायम गर्ने बारे आवश्यक निर्देशन समेत दिएको प्रदेश प्रहरी कार्यालयले जानकारी दिएको छ ।
