धनगढी-नेत्रविक्रम चन्द विप्लव नेतृत्वको नेपाल कम्युनिष्ट पार्टीका स्थायी समिति सदस्य तथा सुदूरपश्चिम प्रदेश इन्चार्ज भरत सीले माओवादी एकजुट हुन जरुरी रहेको धारणा राखेका छन् । मंगलबार धनगढीमा आयोजित पत्रकार सम्मेलनमा बोल्दै उनले माओवादी मात्रै नभएर सबै कम्युनिष्ट एक हुनुपर्ने बेला आएको धारणा राखे ।
उनले भने ‘कम्यनिष्ट प्रति जनताको विश्वास छ । समयमै सबै कम्युनिष्ट एक हुन जरुरी छ । एक हुन नसके मोर्चा सम्म बनाउनु पर्ने समय आएको छ ।’ उनले अहिलेको सरकार निरन्तर चल्नु पर्ने समेत बताए । उनले भने अहिलेको सरकार अगाडिसम्म चल्नु पर्छ । यो सरकारलाई अझ बलियो बनाउनुपर्छ । यो कम्युनिष्ट नेतृत्वको सरकार भएकोले यसलाई अझ बलियो बनाउनु पर्छ । सरकारका सकरात्मक काममा आफ्नो पार्टीको सहयोग र समर्थन रहने समेत उनले स्पष्ट पारे । उनले भने सरकारले चालेका भष्टाचार विरुद्धका काममा हाम्रो सहयोग रहन्छ । राम्रा कामका लागि सधै सहयोग गर्छौ ।
उनले एक सयको नोटमा चुच्चे नक्सा राख्ने सरकारले गरेकोे निर्णय गरेको सकरात्मक भएको प्रतिक्रिया दिए । सीले देशमा सचेत नागरिकले बस्न नसक्ने अवस्था भएको बताउँदै देशभक्त परिवर्तनकारी शक्ति एक भएर देश निर्माणमा लाग्नुपर्ने बताए । उनले भने ‘भष्टाचार बढ्दो छ । आर्थिक रुपले देश टाँट पल्टिने अवस्था छ । जनता पलायन हुँदै छन् । यसमा सबै सचेत हुनु पर्ने बेला आएको छ ।’
