धनगढी । अखिल नेपाल किसान महासंघ सुदूरपश्चिम प्रदेश कमिटीले आगामी आर्थिक वर्षको नीति तथा कार्यक्रम र बजेटमा किसानका मुद्धा समेट्न माग गर्दै आइतबार ज्ञापनपत्र बुझाएको छ ।
आगामी आर्थिक वर्ष २०८१÷८२ को नीति तथा कार्यक्रम निर्माण गर्न मुख्यमन्त्री दीर्घ सोडारी र भूमि व्यवस्था कृषि तथा सहकारी टिका थापालाई ज्ञापन पत्र बुझाइएको किसान महासंघका प्रदेश अध्यक्ष मदनराज रेग्मी बताए ।
रेग्मीले किसान मैत्री एकीकृत कृषि नीति निर्माण गरि लागू गर्नुपर्ने, प्रदेश स्तरीय किसान आयोग गठन, कृषि उत्पादनको तथ्याङ्क अद्यावधिक गर्ने, प्रभावकारी एकीकृत सूचना व्यवस्थापक प्रणाली लागू गर्ने , मल तथा बिउँको सहज लगायत ४२ बुँदे मागपत्र बुझाएको बताए ।
कृषि तथा पशु बिमा निःशुल्क तथा अनिवार्य गर्नु पर्ने, कृषि औजारमा ९० प्रतिशत अनुदान दिनु पर्ने र कृषि औजार कारखाना प्रदेशमै खोल्नु पर्ने व्यवस्था गर्न माग गरिएको अध्यक्ष रेग्मीले जानकारी दिए । ज्ञापन पत्र बुझ्दै मुख्यमन्त्री सोडारीले किसान महासंघले मागहरूप्रति प्रदेश सरकार गम्भीर रहेको र माग सम्बोधन गर्न आफूले विशेष भूमिका खेल्ने बताए ।
उनले किसानका जायज मागलाई सम्बोधन हुने गरि आगमी आर्थिक वर्षको नीति तथा कार्यक्रममा समाबेश गराउने प्रतिवद्धता व्यक्त गरे ।
भूमि व्यवस्था कृषि तथा सहकारी मन्त्री थापाले किसान मैत्री नीति तथा कार्यक्रम र बजेट ल्याउन आफूले सक्दो पहल गर्ने बताइन् ।
