पोखरा । गण्डकी प्रदेशका प्रदेश प्रमुख डिल्लीराज भट्टसँग सुदूरपश्चिम प्रदेशसभाका पूर्व सभामुख अर्जुनबहादुर थापासहितको ३५ सदस्यीय टोलीले भेट गरेका छन ।
कैलालीको धनगढी–८ स्थित सुर्मा साइपाल बचत तथा ऋण सहकारी संस्थाको भ्रमण टोलीमा सहभागी पूर्वसभामुख थापासहितको ३५ टोलीले पोखरा स्थित प्रदेश प्रमुखको निवासमा उनलाई भेट गरेका हुन ।
भेटको क्रममा सहकारीका अध्यक्ष मदनराज रेग्मीलगायतले मायाको चिनो र खादा ओढाई सम्मान तथा शुभकामना प्रकट गरे ।
सो अबसरमा रेग्मीले भने सुदूरपश्चिमका सबैभन्दा अग्रज नेतालाई पार्टीले कदर गरेर ठूलो पदमा आसिन गराउँदा सुदूरकै सम्मानका रुपमा आफूहरुले लिएको बताए ।
प्रदेश प्रमुख भट्टले गृहप्रदेश सुदूरको टोलीलाई स्वागत गर्न पाउँदा खुशी लागेको बताउँदै सम्मान तथा शुभकामनका लागि आभार व्यक्त गरे ।
उनले आफू पार्टीबाट माथि उठेर साझा व्यक्तित्वका रुपमा जिम्मेवारी बहन गरिरहेको उल्लेख गर्दैै यसअघि विवादमा पार्ने कोसिस गरिएपनि सर्वोच्चले आफ्नो काम विधिकानुन बाहिर नरहेको प्रमाणित गरेको बताए ।
सुदूरपश्चिमका पूर्व सभामुख थापाले प्रदेश प्रमुख प्रदेशकै अभिभावक भएको भन्दै सुदूरपश्चिमका त्यागी, सादगी र जीवनभर क्रियाशील व्यक्तित्वलाई अभिभावकका रुपमा पाउने गण्डकीबासी भाग्यमानी रहेको बताए।
उनले सभामुख पदमा रहेर जिम्मेवारी निर्वाह गर्दा प्रदेशप्रमुखको भूमिकालाई राम्रोसँग बुझेको बताउँदै सोच अनुसारकै व्यक्तित्व अहिले गण्डकीले पाएको उल्लेख गरे ।
कार्यक्रमको सञ्चालन सल्लाहकार समिति सदस्य हरिकृष्ण कडायतले गरका थिए ।
