धनगढी – कैलालीमा दिनप्रति दिन गर्मी बढ्दै गइरहेको छ । गर्मीले यहाँको जनजीवन प्रभावित बन्दै गएको छ । अत्यधिक गर्मीकै कारण स्वास्थ्य कार्यालय कैलालीका कर्मचारीको अवस्था बिजोग बनेको छ । त्यहाँका कर्मचारी टिनले छाएको कार्यालय भवनबाट पसिना चुहाएर सेवा दिन बाध्य छन् ।
सो कार्यालयको छानो मात्रै टिन छाएको छ भने वरिपरी प्रिफ्यावले बेरिएको छ । नौ वटा कोठा भएको भवनका आठ वटा कोठा कार्यालय प्रयोजनमा छन् । बाहिरकोभन्दा भित्र बढी गर्मी हुन थालेको अनुभव भइरहेको कर्मचारीले बताएका छन् । आठ वटा कोठामध्ये तीन वटा कोठामा मात्रै पुरानो एसी जडान भएको छ ।
‘सुआहाराले आफ्नो परियोजना सकिएपछि दिएका ४ वटा एसी थिए । त्यसमध्ये मर्मत गरेर तीन वटा एसी जडान गरेका छौँ’, स्वास्थ्य कार्यालय कैलालीका प्रशासन अधिकृत जनकराज जोशीले भने, ‘यी पनि राम्रोसँग चल्दैनन् । समय समयमा मर्मत गरिरहनु परेको छ ।’ ‘यो भवनको संरचना नै त्यस्तै छ । बाहिरभन्दा बढी भित्र गर्मी भएको महसुस हुन्छ’, उनले भने, ‘सबै कर्मचारीले एसी लगाएका कोठा बसेर काम गरौँ भने पनि सम्भब छैन् । ठाउँ पुग्दैन । एसी जडान गरिएका बाहेकका कोठामा बसेर काम नै गर्न सकिदैन् । पसिनाले कागज पत्र नै भिजिहाल्छन् ।’
अहिलेको अत्यधिक गर्मीका बेला कार्यालय भित्र बसेर काम गर्नलाई साह्रै अप्ठेरो भएको कार्यालय प्रमुख आशुतोष श्रेष्ठले बताए । उनले भने,‘माथिबाट टिन तातिन्छन् । पंखाले काम गर्दैन् । एसी जोडौँ भने बजेट छैन् । साह्रै गाह्रो अवस्था भएको छ ।’ उनले भने ‘तालुक निकाएको यसमा ध्यान आवश्यक छ । गर्मीले काम गर्ने नै वातावरण छैन् । एसी नभएका कोठामा बसिनसक्नु छ । कसरी काम गर्न सकिन्छ ।’ उक्त भवन कोभिडको समयमा अस्पताल प्रयोजनका लागि बनाइएको स्वास्थ्य कार्यालय कैलालीले जनाएको छ ।
