धनगढी- सुदूरपश्चिम प्रदेशका शिक्षा,युवा तथा खेलकुद मन्त्री लक्ष्मी विकले बाढीबाट हुने डुबानको समस्याको दीर्घकालिन समाधानको लागि पहल गर्ने बताएकी छन् । बिहीबार कञ्चनपुरको पुनर्वास नगरपालिका–५ सिमरीमा बाढी प्रभावित क्षेत्रको अनुगमनको क्रममा उनले यस्तो बताएकी हुन् ।

उनले भनिन् ‘यस क्षेत्रमा पहिलेदेखि नै डुबानको समस्या रहँदै आएको छ । यसमा दीर्घकालिन योजना बनाएर अगाडि बढ्दा समस्या समाधान हुने हो । यसका लागि मैलै प्रदेश सरकारबाट गर्न सक्ने पहल गर्नेछु ।’ बाढीपीडितलाई क्षतिको आधारमा सहयोग गर्ने उनले बताइन् । उनले भनिन् ‘सरकार यस बिषयमा गभ्भीर छ । प्रत्येक जिल्लाबाट क्षतिको विरिण मागेका छौँ । कहाँ कति क्षति भएको छ । तथ्यांक आएपछि सरकारले के गर्न सक्छ । सक्दो सहयोग गर्न प्रदेश सरकार तयार छ ।’

सो क्षेत्रमा पर्ने केही दिन अगाडिको वर्षाका कारण दोदा नदीको बाढी गाउँमा पसेर सयौँ घरहरु डुवानमा परेका छन् । डुबानमा परेपछि अन्नपात लगायतका सामानहरु भिजेर काम नलाग्ने भएको स्थानीयले बताएका छन् । सोही क्रममा मन्त्री विकले केही दिन अगाडि बाढीमा डुबेर मृत्यु भएका सोही वडाको नयाँकटानका सिर्जना बोगटी,लक्ष्मी बोगटी र आरती बोगटीका परिवारसँग भेटघाट गरेकी छन् । उनले भेटघाटको क्रममा मृतकप्रति श्रद्धाञ्जली व्यक्त गर्दै परिवारजनमा समवेदना व्यक्त गरिन् । मन्त्री विकले मृतकका परिवारलाई प्रदेश सरकारले प्रतिपरिवार एक लाख दिने गरि मन्त्रीपरिषद्बाट नीति गत निर्णय भएको बताइन् ।

मृतकका आफन्तले तीनै जनाका नाममा ट्रस,प्रतिक्षालय बनाउन पहल गरिदिन मन्त्रीलाई आग्रह गरेका थिए । मन्त्री विकले त्यस विषयमा आफूले मन्त्रीपरिषद् बैठकमा कुरा उठाउनुका साथै पहल गर्ने बताइन् ।

अनुगमनका क्रममा रहेका नेकपा माओवादी केन्द्रका केन्द्रीय सदस्य लोकेन्द्र लम्सालले बाढी डुवान बर्सेनीको समस्या भएको बताउँदै यसको स्थायी समाधान गर्न आवश्यक भएको प्रतिक्रिया दिए । उनले भने ‘बाढी डुवान यहाँको पुरानो समस्याको यसको समधानका लागि हाम्रो पार्टीको तर्फबाट पनि पहल गर्छौँ ।’ समस्या समाधानका लागि आफूले सक्दो पहलकमदी लिने उनको भनाइ थियो ।

त्यस्तै मन्त्री विकले बाढीबाट प्रभावित बेलडाँडी गाउँपालिका–५ इमलिया क्षेत्रको पनि अनुगमन गरकी छन् । सो क्षेत्रमा प्रभावित भएका घर परिवारलाई भेटघाट गरेकी छन् । बाढीपीडितका सहयोगको लागि आफूले गर्ने पहलकदमीमा कुनै कमी नरहने उनले प्रतिबद्धता व्यक्त गरिन् ।

सो ठाउँमा चौधर नदीको बाढीले सयौँ परिवार विस्थापित भएको स्थानीयले बताएका छन् । वडा नं. ५ का वडाध्यक्ष ईन्द्रबहादुर खड्काले चौधर नदीको बाढी गाउँमा पस्दा ६० परिवार अझै विस्थापित रहेको बताए । उनले भने ‘यहाँ सयौँ परिवार प्रभावित भएका छन् । ६० परिवार त विस्थापित नै भएका छन् । हामीले उहाँहरुलाई एउटा निजी विद्यालयमा राखेका छौँ । निड्स नेपालको सहयोगमा खानाको व्यवस्था गरेका छौँ ।’

गाउँमा बाढी पसेपछि धेरैले घर भित्रका सामान निकाल्न नपाउँदा सबै सामान बाढीले बगाएर लगेको स्थानीय डम्बरबहादुर शाहले बताए । उनले भने ‘एक्कासी आएको बाढीले यो क्षेत्र एकदमै प्रभावित भएको छ । धेरैका सबै घरभित्रका सामान बगाएका छन् । खाने बस्ने टुंगो छैन् । बाढीले यहाँ धेरैको विचल्ली बनाएको छ । यसमा सरकार गम्भीर हुन आवश्यक छ ।’ शाहले गुनासो गरे ।

क्षतिग्रत विद्यलयको अनुगमन

बाढीले क्षतिग्रस्त भएको बेलडाँडी गाउँपालिका–५ मा रहेको गणेश माध्यमिक विद्यालयको पनि मन्त्री विकले अनुगमन गरेकी छन् । सो विद्यालयमा पसेको बाढी विद्यालयमा रहेका सबै कार्यालयका कागजात,पुस्तकालय,आइसीटीका सामान भिजेर काम नलाग्ने भएको प्रधानाध्यापक जनकबहादुर थापाले बताए । उनले भने ‘विद्यालयको भौतिक संरचनामा पनि क्षति भएको छ । कागजपत्र त काम नलाग्ने भएका छन् । पर्खाल,मन्दिर सबै बगाएर लगेको छ । करिब डेढ करोडसम्मको क्षति भएको छ ।’ मन्त्री विकले विद्यलायको सहयोगका लागि पहल गरिने प्रतिवद्धता जनाएकी छिन् । उनले भनिन् ‘यहाँ धेरै क्षति भएको रहेछ । सबै आफैले प्रत्यक्ष हेरियो । म यसको सहयोगका लागि तयार छु ।’