धनगढी । सुदूरपश्चिम प्रदेशका सरकारी अस्पतालमा निःशुल्क रक्त सेवा सुरु भएको छ । सुदूरपश्चिम प्रदेशका मुख्यमन्त्री कमलबहादुर शाहले आज एक कार्यक्रमकाबीच प्रदेशभरका सबै सरकारी अस्पतालमा निःशुल्क रक्त सेवाको शुभारम्भ गरेका छन् ।
मुख्यमन्त्री शाहले गत साउन २१ गते पदभार ग्रहण गर्दै प्रदेशभर निःशुल्क रगत व्यवस्था गर्ने निर्णय गरेका थिए । सोही निर्णयको कार्यान्वयन स्वरुप आजबाट प्रदेशभर निःशुल्क रक्त सेवा सुरु गरिएको हो ।
सुदूरपश्चिम प्रदेशको सामाजिक विकास मन्त्रालयले नेपाल रेडक्रस सोसाइटी प्रादेशिक रक्त सञ्चार केन्द्र धनगढीसँग सहकार्य गरी ९ वटै जिल्लाका सरकारी अस्पतालबाट निःशुल्क रगत उपलब्ध गराउने भएको छ ।
प्रादेशिक रक्तसञ्चार केन्द्र धनगढी, नेपाल रेडक्रस सोसाइटीका नौवटै जिल्ला शाखा र टीकापुर उपशाखासँग निःशुल्क रगतका लागि आइतबार नै सम्झौता भएको छ ।
रेडक्रसले उपलब्ध गराउने निःशुल्क रगतको प्रति पिन्ट रु. एक हजार एक सय पचास प्रदेश सरकारले भुक्तानी गर्ने सम्झौतामा उल्लेख छ ।
