धनगढी । धनगढी उपमहानगरपालिकाको नगरप्रमुखमा निर्वाचित भई सकेपछि नगरप्रमुख गोपाल हमालको अगुवाईमा धनगढीका १९ वटै वडामा हरेक महिनाको एक दिन निःशुल्क विशेषज्ञ वडा स्वास्थ्य क्लिनिक सञ्चालन हुँदै आएको छ । उपमहानगरले २०७९ साउन १ गतेबाट विशेषज्ञ वडा स्वास्थ्य क्लिनिक सेवा सुरु गरेको हो ।

उपमहानगरपालिकाले शुल्क नलाग्ने गरी नगरबासीलाई घरआँगनमै विशेषज्ञ सेवा दिन उक्त कार्यक्रम संचालन गरिएको छ । उपमहानगरले यस्तो क्लिनिक ग्रामीण क्षेत्रमा चलाउन प्राथमिकता दिएको छ । क्लिनिकमा ज्येष्ठ नागरिक र उपचारमा खर्च गर्न नसक्नेहरूले प्राथमिकता पाउँछन् ।

निःशुल्क विशेषज्ञ वडा स्वास्थ्य क्लिनिकबाट २०८१ को पौष र माघ महिनामा मात्र वडा नं १३ का ४ सय ६५ जनाले सेवा लिएका छन । प्रत्येक महिनाको एक दिन शहरी स्वास्थ्य केन्द्र धनगढी–१३ को भवनमा सो सेवा दिँदै आएको छ । वडामा निःशुल्क विशेषज्ञ सेवा सञ्चालनमा आईसकेपछि  नागरिकलाई पारेको प्रभाव र सेवाका बारेमा निशाना न्युजले वडा नं. १३ का सेवाग्राहीसँग लिएको प्रतिक्रिया प्रस्तुत गरिएको छ ।

पदम साउद
धनगढी उपमहानगरपालिकाका नगरप्रमुख गोपाल हमालले जनताको पक्षमा थुप्रै राम्रा काम गरेको भएपनि अझ बढी प्रभावकारिता यो विशेषज्ञ वडा स्वास्थ्य क्लिनिक लागेको छ । म सुगरको बिरामी हुँ । यो सेवा घरआँगनमै आइसकेपछि आफूलाई निकै ठूलो राहत भएको छ । पहिला बजार धाउनु पथ्र्यौ । औषधीका लागि लाईन लाग्नु पथ्र्यौ । पैँसा थुप्रै खर्च हुन्थ्यो । अब अहिले त्यस्तो छैन । ढुक्कका साथ उपचार गर्न जान्छु । निःशुल्क रुपमा औषधी पनि पाइन्छ । म मात्रै होइन मेरो घरका चारै जना यो सेवाबाट प्रभावित भएका छौँ । क्लिनिक आएको बेलामात्रै औषधी पाइने गरेको छ । सधै औषधी पाइने भए अझै सहज हुन्थ्यो ।

जानकी ऐडी
धनगढी उपमहानगरपालिकाले सञ्चालन गरेको यो सेवा हाम्रा लागी वरदान साबित भएको छ । म ग्याष्ट्रिककी बिरामी हुँ । शिविर आइसकेपछि निःशुल्क रुपमा औषधी पाइनुका साथै स्वास्थ्य परीक्षण गरिने गरिएको छ । यो काम प्रति म उपमहानगरपालिकालाई धन्यवाद दिन चाहान्छु । विशेष गरी नगरप्रमुख गोपाल हमालप्रति आभार व्यक्त गर्दछु ।

मीना कुँवर
म औषधी उपचारका लागि बच्चालाई लिएर बजार धाउनु पथ्र्यो । त्यो समस्या हटेको छ । बच्चाको सबै चेकजाँच वडा क्लिनिक बाटै गरिरहेकी छु । हामीलाई राम्रो छ । पहिला हामीले यसरी सेवा पाएका थिएनौँ । अहिले पाइरहेका छौँ । नगरप्रमुख गोपाल हमाल दाजुले अझै यो भन्दा बढी काम गरेको देख्न पाउँ ।

निशा आउजी(कार्यपालिका सदस्य,धनगढी उपमहानगरपालिका)
वडा स्वास्थ्य क्लिनिक सञ्चालनमा आइसके पछि जनताको आकर्षण बढेको छ । पहुँच नभएका बिरामीले पनि सेवा पाइरहेका छन् । आर्थिक अवस्था कमजोर भएका बिरामीका लागि यो सेवा निकै प्रभावकारी भएको पाइएको छ । महिनाको एकचोटी भएपनि स्वास्थ्य परीक्षण गरेर सेवा लिन पाएका  छन् ।