काठमाडौं । रूपन्देही, शुद्धोधन गाउँपालिका-४ फर्साटिकरस्थित सडकमा लिटल फ्लावर बोर्डिङ स्कुलको लु.१ क १३२६ नम्बरको बसमा बिहीबार दिउँसो आगलागी हुँदा बस पूर्णरूपमा जलेर नष्ट भएको छ ।
बारा, देवताल गाउँपालिका-७ रामपुरवा बस्ने ४८ वर्षीय शिव चन्द्र राउत अहिरको कच्ची घरमा विद्युत सर्ट भई बिहीबार बिहान आगलागी हुँदा घर पूर्णरूपमा जलेर करिब १ लाख १० हजार रूपैयाँ बराबरको धनमाल नष्ट भएको छ ।
रौतहट, ईशनाथ नगरपालिका-८ मन्सरी टोल बस्ने शेख सनाउल हकको घरमा बिहीबार बिहान आगलागी हुँदा घर, घर भित्र रहेको अन्नपात, लताकपडा, भाँडावर्तन र कपडाहरू पूर्णरूपमा जलेर नष्ट भएको छ । प्रहरीले स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ ।
