धनगढी । कैलालीको गोदावरी नगरपालिका–२ का स्थानीय गोकर्ण भट्टले माछापालन व्यवसाय सुरु गरेका छन् । राजनीतिसँगै उत्पादनलाई पनि अगाडि बढाउने उदेश्य बोकेर लागेका उनले १ बिगाह ५ कठ्ठा जमिनमा माछापालन व्यवसाय सुरु गरेका हुन् ।
केही समय अगाडिदेखि व्यवसाय सुरु गरेको उनले बताए । ‘३० हजार माछाका भुरा (पंंगेसियस) पोखरीमा हालेको छु’ उनले भने ‘दानका लागि मात्रै दैनिक १० हजार खर्च हुन्छ ।’ माछाका भुरादेखि चारो (दाना) सबै भारतबाट ल्याउने गरेको उनले बताए । ‘नेपालमा के छ ? यहाँ केही पनि छैन्’ उनले भने ‘माछादेखि आवश्यक पर्ने सबै बस्तु भारतबाट नै आउने गर्दछ ।’
७ महिना भित्र माछा उत्पादन भइ बेच्ने हुने उनले बताए । बजारको समस्या नभएको बताउँदै उत्पादन भइसकेपछि व्यापारीहरु किन्नका लागि पोखरीमै आउने गरको उनले बताए ।
उनले भने ‘हुन त मेरो यो माछापालन व्यवसाय १० बर्षदेखिको हो । मैले अर्कोलाई भाडामा दिएको थिए । तर, म उनीहरुसंग खासै सन्तुष्ट भएन पछि मैले यो वर्षबाट आफै संचालन गर्नुपर्छ भनेर सुरु गरेको हुँ ।’ उनले भने ‘राम्रो गर्ने कृषकलाई भारत सरकारले ९० प्रतिशत अनुदान दिएको छ तर नेपालमा पहुँचको भरमा या शक्तिको आडमा कृषकलाई अनुदान दिने गरिएको छ । यहाँ वास्तविक कृषक हुन वा होइनन् नछुट्याइकन अनुदान दिइन्छ । वास्तविक कृषकले नेपालमा अनुदान पाएको बिरलै घटना हुन सक्छ ।’
यो व्यवसाय निरन्तर रुपमा अगाडि बढाउँदै लैजाने उदेश्यका साथ बढेको उनले बताए । माछामा चाहिने आवश्यक सामग्री दैनिक युटुबमा सर्च गरेर हेरेर सोही अनुसार ल्याउने गरेको उनले बताए । ‘नयाँ केही भेटाउना साथ म खरिद गर्न गइहाल्छु’, उनले भने ‘आजभोलि माछाकै हेरचाहमा दैनिकी गइरहेको छ ।’
त्यस्तै,उनले राजनीति सामाजिक सेवा भएको उनले बताए । उनले भने ‘राजनीति गर्नुहुन्न मैले भनेको होइन् । राजनीति पनि गर्ने उत्पादनलाई पनिसंगै लगेर जाने भनेको हो ।’ उनले राजनीतिलाई मागी खाने भाँडोको रुपमा नेपालका राजनीतिक दलका नेताहरु लागिरहेको बताए । ‘राजनीति शुद्ध सामाजिक सेवा हो । यस्लाई मागी खाने भाँडो बनाइनु हुँदैन’ उनले भने ‘राजनीति गर्ने मान्छै कुनै न कुनै व्यवसायमा लागेको हुनुपर्छ ।’
