धनगढी । कैलालीमा सिकलसेल एनिमिया रोगका बिरामी बढ्न थालेका छन् । प्रायः चौधरी थारु समुदायमा देखिने यो रोगका बिरामी जिल्लामा वर्षेनी बढ्दै गएको स्वास्थ्य कार्यालय कैलालीले जनाएको छ ।
चालु आवको हालसम्म थारु बाहुल्य क्षेत्रमा शिविरमार्फत मिति यही असार ९ गतेदेखि सञ्चालन भएको स्क्रिनिङ्ग शिविरमा एक हजार दुई सय ६७ जनाको रगत परीक्षण गर्दा १ सय ४५ जनामा सिकलसेल वाहक (ट्रेड) देखा परेको स्वास्थ्य कार्यालय कैलालीका नसर्ने तथा सिकलसेल सम्बन्धी रोगका श्रोत व्यक्ति मीनबहादुर धामीले जानकारी दिए ।
जिल्लाका आठ वटा पालिकाका ८ ठाउँमा शिविरमार्फत थारु समुदाय बाहुल्य क्षेत्रमा निःशुल्क रगत जाँच गरिएको र प्रदेश जनस्वास्थ्य प्रयोगशालामा कन्फर्म परीक्षणको लागी पठाईएको उनले बताए ।
सिकलसेल पुष्टि भएकाले जीवनभर उपचार गर्नुपर्ने हुन्छ । ‘बाहक (ट्रेड) देखा परेकाले रोग सार्न सक्ने भएकाले महिला र पुरुषले विवाह गर्नुभन्दा पहिले रगत परीक्षण गर्नुपर्ने हुन्छ’ उनले भने ‘महिला र पुरुष दुबै जना बाहक(ट्रेड) देखा परेकाले विवाह गर्दा बच्चाहरु रोगी जन्मन सक्छन् ।’
उनले यो बंशानुगत रोग भएकाले सिकलसेल भएका आमाबुवाबाट जन्मेको सन्तानमा सर्ने बढी सम्भावना रहने बताए । ‘यो प्रायः थारु समुदायमा देखिने गरेको छ’, उनले भने ‘बंशानुगत रोग भएकाले दुबै जनामा सिकलसेल छ भने उहाँहरुबाट जन्मिने सन्ततीमा रोग सर्ने सम्भाना बढी हुन्छ ।’ उनले भने ‘सिकलसेल भएका बिरामीको पूर्णरुपमा उपचार हुँदैन् । जीवनभर उपचार गर्नुपर्ने हुन्छ । रगत रिफ्रेसमेन्ट गरिराख्नु पर्ने हुन्छ ।’
उनले भने ‘सिकलसेल रोग लागेमा हाडजोर्नी दुख्ने,थकाइ लाग्ने,रक्त अल्पता हुने जस्ता समस्या हुने गर्दछन् । बाहक (ट्रेड) भएका व्यक्तिमा खासै समस्या नदेखिने र देखिए पनि सामान्य हुने गर्छ ।’ चालु आवमै चौधरी थारु बाहुल्य क्षेत्र भएकाका अन्य पालिकामा पनि सिकलसेलको स्किनिङ्ग शिविर सञ्चालन गरिने उनले बताए । परीक्षण र निदान हुन थालेपछि जिल्लामा सिकलसेलका बिरामीको सङ्ख्या बढ्दै गएको उनको भनाइ छ । सरकारले सिलकलेल भएका बिरामीलाई १ लाखसम्मको उपचार गर्ने गरेको उनले बताए ।
उनले भने ‘बिरामीले जीवनभर उपचार गर्नुपर्ने भएकोले एक लाखले नपुग्ने बताउने गरेको र सीपमुलक तालीम दिएर आयआर्जनका कार्यक्रम गरिदिएको भए उपचारसँगै जीविकोपार्जमा सहज हुने बिरामीले बताउने गरेका छन् ।’
