धनगढी । धनगढी उपमहानगरपालिका–१९ फुलबारीका नेपालु चौधरी व्यवसायसँगै राजनीतिमा क्रियाशिल भएर लागेका छन् । नेकपा एमाले पार्टीमा क्रियाशिल चौधरी २०५४ सालमा साबिकको फुलबारी गाउँविकास समिति वडा नं. १ को वडाध्यक्षमा निर्वाचित भएका थिए ।
राजनीतिसँगै उनले २०५६ सालदेखि हार्डवयर व्यवसाय सञ्चालन गर्दै आएका छन् । २०४४ सालमा अध्ययनका क्रममा राजनीतिसँग जोडिएका उनले २०४९ सालदेखि एमाले पार्टीमा सक्रिय राजनीति सुरु गरेको बताए ।
सरल र मिजासिलो स्वभावका चौधरी पार्टीको सक्रिय राजनीतिसँग जोडिएको पाँच वर्षमै वडाध्यक्षको टिकट पाए र निर्वाचित पनि भए । त्यसैको फलस्वरुप उनी निरन्तर पार्टीको क्रियाशिल राजनीतिसँग व्यवसाय गर्दै आएका छन् ।
उनी वडा कमिटी सदस्य, इलाका सचिव, युवासंघका जिल्ला अध्यक्ष, दुई कार्यकाल केन्द्रीय सदस्य हुँदै एमाले पार्टीको जिल्ला सदस्य र जिल्ला कमिटीको उपसचिवसम्मको जिम्मेवारीमा रहे । हाल उनी नेकपा एमाले सुदूरपश्चिम प्रदेश कमिटी सचिवालय सदस्यको भूमिकामा छन् ।
पार्टीको विभिन्न कमिटीमा लामो समयदेखि विभिन्न भूमिका कुशलतापूर्व निर्वाह गर्दै आएका उनी २०७४ सालमा भएको प्रदेश सभा सदस्य क्षेत्र नम्बर ५(१) बाट निर्वाचित भई प्रदेश सभाको विधायन मामिला समितिको सभापतिको जिम्मेवारीमा रहे ।
२०७९ सालको प्रदेश सभा सदस्यको पुनः उम्मेदवार बने र पार्टीभित्रका केही व्यक्तिका कारण पराजित बन्न पुगेको उनको तितो यथार्थ छ । उनी तत्कालिन नेपाली काँग्रेस, माओवादी र समाजवादी पार्टीको संयुक्त गठबन्धनका उम्मेदवार रमेशसिंह धामीसँग झिनो मतअन्तरले पराजित भएका थिए ।
उनी भन्छन् राजनीति विशुद्ध समाज सेवा गर्नको लागि हो , व्यवसाय घरपरिवारको आर्थिक अवस्था मजबुद बनाउनका लागि गरिन्छ । तसर्थ राजनीति गर्ने व्यक्तिले व्यवसायमा जोडिनुपर्छ भनेर नै मैले राजनीतिसँगै व्यवसाय सञ्चालन गर्दै आएको हो ।
२०५६ सालमा ५० हजारको लगानीबाट सुरु गरेको उनको व्यवसायमा अहिले एक करोड बढीको लगानी छ । व्यवसाय बढाउन लगानी पनि बढाउनु नै पर्छ उनले भने त्यसका लागि बैंकबाट ऋण लिएको छु । उनले आफ्नो पसलमा दुई जनालाई प्रत्यक्ष रोजगारी पनि दिएका छन् ।
अहिले व्यापार व्यवसाय पहिलेको जस्तो छैन् । बैंक किस्ता तिर्न हम्मेहम्मे छ । मेरो मात्र होइन अहिले सबको व्यापार व्यवसायमा समस्या देखिएको छ ।
एक छोरा र तीन छोरीका अभिभावक चौधरीका छोराबुहारी जापान छन् । कान्छी छोरी बीएलएलबी अध्ययनरत छिन् भने दुई छोरीको विवाह भइसकेको छ ।
