धनगढी । सुन्तलामा रोग लाग्न थालेपछि चुरेका किसान चिन्तित हुन थालेका छन् । सुन्तला खेतीबाटै राम्रो आम्दानी गर्दै आएका यहाँका किसान सुन्तलामा रोग लाग्न थालेपछि चिन्तित भएका हुन् ।
सुन्तलाका हाँगा, पात बटारिँदै जाने,पहेँलो हुने, बोट सुक्दै जाने, ढुसी लाग्ने,दानामा दाग देखिएको चुरे गाउँपालिका–३ सुनारीका स्थानीय किसान टेकबहादुर शाहले बताए ।
पूर्व वडाध्यक्ष समेत रहेका शाहले भने ‘मैले करिब ८ रोपनी जग्गामा फलफूल खेती गरेको छु । करिब तीन सय ५० बोट सुन्तला लगाएको छु । सुन्तलामा दाना लाग्ने समयमा रोग लागेपछि चिन्तित बनाएको छ ।’
उनले वडाभित्रका धेरैजसो किसानका सुन्तलमा रोग देखिएको बताए । उनले भने ‘यहाँका सयौं किसानले व्यवसायिक सुन्तला खेती गर्नुभएको छ । धेरैजसो किसानको सुन्तलामा यस्तो रोग देखिएको छ । कसैकोमा कम छ,कसैको बढी छ ।’
रोग नियन्त्रणका लागि सम्बन्धित निकायको ध्यान जान आवश्यक भएको बताउँदै शाहले रोग पहिचानका लागि कृषि ज्ञानकेन्द्र कैलालीमा नमुना समेत बुझाइएको बताए ।
उनले वडाभित्रका किसानले सुन्तलाखेतीबाट वार्षिक न्युनतम दुई लाखदेखि अधिकतम १२ लाखसम्म आम्दानी गर्ने गरेको बताए । पछिल्लो समय देखिएको रोगका कारण किसानलाई चिन्तित बनाएको शाहले बताए ।
