धनगढी । व्यवसायिक पत्रकारिताले नागरिक र पत्रकार बीचको सम्बन्ध मजबुद भएर जाने एक कार्यक्रमका सहभागीहरुले बताएको छ ।
बुधबार नेपाल पत्रकार महासंघ कैलाली शाखाले धनगढीमा आयोजना गरेको नागरिक र पत्रकार बीचको सम्बन्ध बिषयक अन्तरक्रिया कार्यक्रमका सहभागीले सो कुरा बताएका हुन् ।
नेपाली कांग्रेस कैलालीका सचिव नृप सुनारले विश्वसनीयता,तथ्यमा आधारित रहेर पत्रकारले सूचना सम्प्रेषण गर्न सके नागरिक र पत्रकार बीचको सम्बन्ध सुधार भएर जाने बताए ।
अनौपचारिक क्षेत्र सेवा केन्द्र (इन्सेक)का सुदूरपश्चिम प्रदेश संयोजक खडकराज जोशीले पत्रकारको क्षमतामा कमी हुँदा पत्रकारितामा विश्वसनीता ह्रास हुन थालेको बताए । उनले भने ‘जुन बिषयमा लेख्ने हो । त्यो बिषयको ज्ञान राम्रोसंग भए मात्र विश्वसनीय पत्रकारिताको झल्को दिन्छ ।’ स्वतन्त्र पत्रकारिताले पनि नागरिक र पत्रकारको बीचको सम्बन्ध सुधार भएर जाने उनको भनाई छ ।
कार्यक्रमका अर्का सहभागी शेरबहादुर बस्नेतले अहिले प्रविधिको विकाससंगै समाचार तथ्यपरक नभइ तोडमोड हुने कारणले विश्वसनीयता कम भइरहेको बताए । एआईको प्रयोगले अहिले समस्या सिर्जना आएको उनको भनाइ छ ।
त्यस्तै,सहभागी पदमविक्रम सिंहले खोज पत्रकारिता अहिले आवश्यक रहेको बताए । समाज रुपान्तरणका लागि पत्रकारको भूमिका सहि हुन जरुरी रहेको र समाचार सम्प्रेषण गर्दा तथ्यका आधारमा हुनुपर्नेमा जोड दिए ।
कार्यक्रमका सहभागी विमला कडायतले पत्रकारले समाचार लेख्दा निष्पक्ष हुन आवश्यक रहेको बताइन् । जलवायुका कुराहरु,सम्भावित जोखिमका बिषयमा पत्रकारले समाचार सम्प्रेषण गर्न जरुरी रहेको सहभागीहरुको जोड रहेको थियो ।
नेपाल पत्रकार महासंघका सुदूरपश्चिम प्रदेश अध्यक्ष भरतबहादुर शाहले पत्रकारले आचारसंहितामा रहेर समाचार सम्प्रेषण गर्न जरुरी रहेको बताए । नेपाल पत्रकार महासंघ कैलाली शाखाका अध्यक्ष श्रवण देउवाले सहभागीका सुझावमा टेकेर अगाडि बढ्ने प्रतिवद्धता व्यक्त गरे ।
