गोदावरी । गोदावरी कृषि विकास सहकारी संस्था लिमिटेडले कृषकलाई आत्मनिर्भर बनाउने उदेश्यले कृषि र पशुपालन क्षेत्रमा नयाँ योजना ल्याएर काम गर्न थालेको छ ।
गोदावरी नगरपालिका ११ मा रहेको सो सहकारीले एक समूह एक तरकारी खेती, भैंसी र बाख्रापालन पकेट क्षेत्र जस्ता योजना ल्याएर काम गर्न थालेको हो ।
भौगोलिक विकटतासंगै सामाजिक र आर्थिक रुपमा पछि परेको सो क्षेत्रका कृषकको समस्या, समाधानका उपाय लगायतका विषयमा पनि गहन अध्ययन गरेर संस्थाले काम गरिरहेको संस्थाका व्यवस्थापक गणेशबहादुर विकले जानकारी दिए ।
कृषि ज्ञान केन्द्र धनगढीको सहयोगमा २३ जनाले च्याउखेती गरेको उनले बताए । उनले भने ‘चालु आर्थिक बर्षबाट कागतीखेती शुरु गरिएको छ । टनेल घर वितरणका कार्यक्रम पनि संगसंगै गर्दै गइरहेका छौँ ।’
ग्रामीण उद्यम तथा आर्थिक विकास आयोजना (रिड) को सहयोगमा ४५ कठ्ठा जमिनमा खुर्शानी खेती सम्पन्न गरिएको उनले बताए । चालु आर्थिक बर्षबाट लसुन,प्याज खुर्सानी र बेसारखेतीको पकेट क्षेत्र निर्धारण गरि काम गर्ने लक्ष्य लिएको उनको भनाइ छ । गोठेमलका लागि खाल्डो सुधार अभियानको कार्यक्रम संचालन भइरहेको उनले बताए ।
एक समुह एक तरकारी खेती कार्यक्रम अन्तरगत प्ररम्परागत कृषि प्रणालीलाई निरुत्साहित गरी आधुनिक कृषि प्रणाली लागू गर्न संस्थाका सदस्यहरुले २ कठ्ठा जमिनमा अनिवार्य तरकारी खेती गर्नु पर्ने निर्णय गरेको उनले बताए । आफैबाट यो प्रकृया सुरुभयो भने व्यवसायिक तरकारी खेती तिर आम कृषकलाई आकर्षित गराउन सकिने र अरुले पनि सिक्ने उदेश्यले आफैबाट तरकारी खेती गर्न सुरु गरिएको उनले बताए ।
त्यस्तै, संस्थाले पशुपालक कृषकका लागि दुई किस्ता गरेर भैंसी वितरण गरेको छ । २३ वटा भैंसी र दुई राँगा वितरण गरेको उनले बताए । गोदावरी नगरपालिकाको वडा नं १०,११ र १२ का कृषकलाई सो भैंसी र राँगा वितरण गरेको उनले बताए । मुल्यांकनको आधारमा राम्रो गरिरहेका कृषकलाई छनोट गरेर भैंसी राँगा वितरण गरिएको उनले बताए ।
कृषि तथा सहकारी मन्त्रालय अन्तरगतको सहकारी रजिष्टार कार्यालयले बीउपुजी अनुदान बाफत ५ लाख नगद उपलब्ध गराएको उनले बताए । उक्त रकम बाखपालक कृषक लागि सस्तो व्याज ९ प्रतिशतका दरले ऋण उपलब्ध गराउँदै आएको उनको भनाइ छ ।
