धनगढी । पश्चिम नेपालका थारू समुदायको प्रमुख सांस्कृतिक पर्वको रुपमा रहेको अट्वारी पर्वको तयारीमा थारु समुदाय जुट्न थालेका छन् । यही भदौ ८ अट्वारी पर्व परेको छ ।
हरेक वर्ष कृष्ण जन्माष्टमीपछिको दोस्रो साताको आइतबार तथा कुशेऔंसी पछिको पहिलो आइतबारका दिन अँट्वारी पर्व मनाइन्छ ।
धनगढी १५ का पुर्व वडा अध्यक्ष रतीराम चौधरीले अट्वारी मुलतः थारु समुदायका पुरुषले मनाउने पर्व रहेको बताए । तर, थारु समुदायका महिला पनि अँट्वारी व्रत बस्ने गर्दछन् ।
पश्चिम नेपालको कैलाली, कञ्चनपुर, बर्दिया र दाङ जिल्लाका थारु समुदायले अँट्वारी पर्व मनाउने गरेको उनले बताए । थारु समुदायको यो माघीपछिको दोस्रो प्रमुख सांस्कृतिक, सामाजिक पर्व हो ।
अट्वारीको अघिल्लो दिन अर्थात् शनिबार मध्य रातीमा दर खाएर यो पर्व सुरु हुन्छ । आइतबार ब्रत बस्ने गरिन्छ उनले भने साँझ प्रत्येकले आफ्नो घरको छुट्टै कोठा लिपपोत गरेर चोखो रूपमा अन्डिक रोटी, खुर्मा पकाएर अँट्वारी पुजा गर्ने गर्दछन् ।
अँट्वारी पुजामा अन्डिक रोटी, काँक्रो, दही, केरा, अम्बा लगायतका अग्रासन झिकेर पूजा गरिन्छ । त्यसको भोलिपल्ट बिहान पाँच अथवा सात प्रकारका गेडागुडीयुक्त तरकारी र भातको फरहार गरिन्छ । फरहारपछि आफ्ना विवाहित चेलीबेटीलाई अग्रासन दिन जाने चलन रहेको उनले बताए ।
त्यस्तै भलमन्सा टेकराज चौधरीले अट्वारी माइतीले आफ्ना चेलीबेटीलाई सम्मान दिने तथा दाजुभाई र दिदीबहिनीबीच मायाप्रेम साट्ने पर्वका रूपमा स्थापित हुने गरेको बताए ।
त्यस्तै, अट्वारीलाई एकता, विजय तथा भातृत्व प्रेमको प्रतीकका साथै बल र सुरक्षाको प्रतीकका रुपमा मनाइने गरेको छ ।
यसैबीच, सुदूरपश्चि प्रदेश सरकारले अट्वारी पर्वमा अवसरमा सार्वजनिक विदा दिने निर्णय गरेको छ । प्रत्येक वर्ष अँट्वारी पर्वमा सार्वजनिक विदा दिँदै आएको प्रदेश सरकारले यस वर्ष भने भदौ ८ गते अट्वारी पर्वको विदा दिने निर्णय गरेको छ ।
