धनगढी । नेकपा (माओवादी केन्द्र) स्थायी समिति सदस्य एवं पूर्वमन्त्री खगराज भट्टले खेलाडीहरु कुनै देशको सीमामा मात्रै सीमित नहुने बताएका छन् ।
अखिल नेपाल खेलकुद महासङ्घ सुदूरपश्चिम प्रदेशको शनिबार धनगढीमा आयोजित प्रथम प्रदेश सम्मेलनको उद्घाटन कार्यक्रममा बोल्दै उनले यस्तो बताएका हुन् ।
उनले खेलाडीहरु कुन देशमा जन्मिन्छन् भन्ने कुराले अर्थ नराख्ने बताए । उनले भने ‘राष्ट्रका खेलाडीहरुको श्रेष्ठता,कुसलता,प्रतिभा सिंगो संसारले देख्ने र चिन्ने अवसर पाइरहेको हुन्छ । उनीहरुको कर्मले संसारको निमित्त आस्था र प्रेरणाको पुञ्ज बनेर उनीहरु जन्मिरहेका हुन्छन् ।’
नेता भट्टले भने ‘खेलकुदले जब प्रतिभाहरु,श्रेष्ठताहरु जन्माउँछ तब ती श्रेष्ठ अनुहारहरु संसारकै आदर्शको केन्द्र बन्न पुग्छन् । ती कुनै देशको सीमामा मात्र रहँदैनन् ।’
उनले भने ‘खेल देशको एउटा गहन क्षेत्र हो । जहाँबाट त्यो राष्ट्रको पहिचान सर्वश्रेष्ठ पहिचान बन्न पुग्छ ।’ उनले खेलकुदले दिने सम्मान,आयआर्जन,सपना र लक्ष्य त्यो असाधारण हुने बताउँदै हरेक खेलाडीले असाधारण,संघर्ष,अनुशासन,कहिल्यै नथाक्ने,असल शिष्यको जीवन जीउन तयार हुनुपर्ने बताए ।
सम्मेलनले नयाँ कार्यसमिति चयन गर्ने आयोजकले जनाएको छ । कार्यक्रममा विभिन्न जिल्लाबाट आएका खेलाडीहरुले कला प्रदर्शन समेत गरेका थिए ।
