धनगढी । कैलालीको गेटास्थित सहिद दशरथ चन्द स्वास्थ्य विज्ञान विश्वविद्यालय परिसरमा स्थानीयले सरसफाइ गरेका छ्न ।
सहिद दशरथ चन्द्र स्वास्थ्य विज्ञान विश्वविद्यालय स्थापनार्थ सङ्घर्ष समितिको अगुवाईमा स्थानीयहरुले सरसफाई गरेका हुन् ।
विश्वविद्यालयको प्रशासनिक, एकेडेमी भवनको परिसर झाडीले झागिएको थियो । तीन वर्ष अघि नै निर्माण सम्पन्न भएर सञ्चालनमा नआएको विश्वविद्यालयको प्रशासनिक, एकेडेमी भवनको परिसरमा झाडी सफाई गरिएको हो ।
सङ्घर्ष समितिका सदस्य विनोद विष्टले आन्दोलनकै कार्यक्रम अन्तरगत साङ्केतिक रूपमा दबाब दिन विश्वविद्यालय परिसरमा झाडी सफाइ गरिएको बताए ।
उनले सरकारका कारण अर्बौका पूर्वाधार जीर्ण बन्ने खतरा भएको बताए । सरकारले ऐन बनाए पनि त्यसको कार्यान्वयनमा बेवास्ता गरेको उनले बताए । उनले ऐन पारित भएको २ महिना पुग्दा पनि विश्वविद्यालयको प्रशासनिक टिम नै नियुक्ति गर्न बेवास्ता गरेको उनले उल्लेख गरे ।
सरसफाइ कार्यक्रममा संघर्ष समितिका पदाधिकारी,सदस्य र स्थानीयहरुको सहभागिता रहेको थियो ।
विश्वविद्यालय परिसरमा झाडी उम्रिएर कुरूप बनेको छ । हाल ५० शय्याको अस्पताल सञ्चालन भएको भवन वरपर समेत झाडीले झागिएको थियो ।
संघर्ष समितिका सचिव धर्मसिंह कुँवरले सरकारले अनेक बाहानाबाजी गर्दै मेडिकल विश्वविद्यालय सञ्चालन प्रक्रिया लम्ब्याउने काम गरिरहेको बताए ।
मेडिकल विश्वविद्यालयका लागि अहिले नै ३ सय बेडको अस्पताल सञ्चालन गर्नुपर्ने आवश्यक देखिए पनि त्यो हुन नसक्नु दुखद रहेको उनको भनाइ छ ।
सङ्घर्ष समितिका संयोजक लोक राज पाण्डेले एप्रोन लगाएका विद्यार्थीहरू पढ्न सुरु नगर्दा सम्म आफूहरूको सङ्घर्ष जारी रहने बताए ।
उनले विश्वविद्यालय अन्तरगत रहने अस्पताल ५० शय्याको मात्रै रहेकाले अस्पतालको क्षमता तत्काल ३ सय शय्या विस्तार गरेर यसै वर्ष देखि चिकित्सा शिक्षा अध्यापन गराउनुपर्ने बताए ।
सरकारले गेटामा ६ अर्ब ६८ करोड लगानीमा ४३ वटा भवन निर्माण गरेको छ ।
