धनगढी । बाढी आउदा डुङ्गाको सहायताले नदी पार गर्नुपर्ने समस्याको अन्त्य भएको छ । झोलुङ्गे पुल सञ्चालनमा आएपछि कैलालीको कैलारी गाउँपालिका–३ मोहनपुरका स्थानीयलाई डुङ्गाको सहायताले नदी पार गर्नुपर्ने समस्याको अन्त्य भएको हो ।
९५ घरधुरी रहेको सो गाउँको जनसंख्या ५२५ रहेको छ । मोहनपुर र भितरिया गाउँका स्थानीयको समस्यालाई मध्यनजर गरेर सङ्घीय सरकारको सहरी विकास मन्त्रालय स्थानीय पूर्वाधार विभाग अन्तर्गत सस्पेन्सन बृज डिभिजनको तीन करोड ४३ लाखको लागतमा उक्त झोलुङ्गे पुल निर्माण गरिएको हो ।
सो पुल निर्माणका लागि एमपी ठेगिम सनलाइट जेभी नेपालगञ्ज बाँके निर्माण कम्पनीसँग २०७८ असोज १३ गते सम्झौता भएर २०८१ माघ १० गते पुल निर्माणको काम सम्पन्न भएको थियो । झोलुङ्गे पुल निर्माण सम्पन्न पश्चात सो क्षेत्रका नागरिक निकै खुशि छन् ।
वडा नम्बर ४ भितरिया जोड्ने झोलुङ्गे पुल निर्माणले उनीहरुलाई निकै राहत प्रदान गरिरहेको छ । पुल निर्माण पश्चात किनमेलका लागि भारतीय बजार चन्दन चौकी जान अन्त्य भएको भल्मन्सा शीतलप्रसाद डगौराले निशाना न्युजलाई जानकारी दिए ।
उनले भने ‘हामी यो गाउँमा बस्ने सबै मुक्तकमैया हौँ । २०३६ सालबाट यो क्षेत्रमा बसोवास गर्दै आएको उनले बताए । पहिला नदी नजिकै थियो वर्षातमा डुवान हुँदा ठाउँसारी गरेर अन्त जानु पर्ने बाध्यता थियो ।’
उनले भने ‘डुङ्गाको व्यवस्था नहुँदा रुखको वेराको सहायताले धेरै बर्ष सम्म नदी वारपार गर्नुपर्ने अवस्था थियो ।’ नेपाल रेडक्रस सोसाइटी,मर्सिकोर संस्थाले डुङ्गा र लाईफ जाकेटको सहयोग गर्दा नदी पार गर्न केही सहज भएको उनले बताए ।
अहिले पुल निर्माण भयो र नदीले धार परिवर्तन गर्दा १० बर्षदेखि बाढी नआएको उनले बताए । २०६४ सालमा आएको बाढीले घरपालुवा जनावर गाई,भैंसी,बाख्रा, सुगुरबंगुर सबै बगाएर लगेको उनले बताए । नदीमा बाढी आएको बेला कुनै साधन नहुँदा २०६६।०६७ मा सुत्केरी महिला पार्वती चौधरीलाई अस्पताल लैजान नसक्दा मृत्यु भएको उनको भनाइ छ ।
बाढीले धेरै सताउने गरेको र रेडक्रस सोसाइटीले गाउँका सबै मानिस अट्ने सेल्टर हाउसको निर्माण पनि गरेको उनले बताए । बितेका दिनहरुमा बाढी आउँदा सोही घरमा गरर ज्यान जोगाउने गरिएको उनले बताए ।
उनले भने ‘अहिले त्यस्तो समस्या छैन । नदीमा तटबन्धन भइसक्यो र पुल संचालनमा आएका कारण जीवन यापन सहज भइरहेको छ ।’ बिगतका बर्षहरुमा नदीमा पुल नहुँदा सबैभन्दा बढी बालबालिकालाई स्कुल जान समस्या हुने गरेको स्थानीय सोमवतीदेवी चौधरीले बताइन् । पुल बनेपछि बालबालिकालाई स्कुल जान सहज भएको उनले बताइन् । किनमेल गर्न भारतीय बजार जानुपर्ने बाध्यताको पनि अन्त्य भएको उनको भनाइ छ ।
