धनगढी । कैलालीमा १० लाख बढी मूल्यको अवैध औषधिसहित दुई जना पक्राउ परेका छन् । जिल्लाको धनगढी उपमहानगरपालिका वडा नम्बर ७ मोतिचोकबाट अवैध औषधिसहित दुई जना पक्राउ परेका हुन् ।
सोमबार सशस्त्र प्रहरी बल नेपाल नम्बर ३४ गण हेडक्वाटर कैलालीले १० लाख ६५ हजारभन्दा बढी मूल्यको अवैध औषधिसहित दुई जनालाई नियन्त्रणमा लिएको हो ।
जिल्लाको कैलारी गाउँपालिका–५ पवेराका ३० वर्षीय मनोजकुमार चौधरी र गौरीगंगा नगरपालिका–१० उदासीपुरका २६ वर्षीय खेमराज चौधरी अवैध औषधसहित पक्राउ परेको सशस्त्र प्रहरी बल कैलालीले जनाएको छ ।
भारतबाट भन्सार छलेर ल्याएको औषधि र मोटरसाइकल सशस्त्र प्रहरी बलले नियन्त्रणमा लिएको छ । सशस्त्र प्रहरी बल नेपाल ३४ नम्बर गण हेडक्वाटर कैलालीबाट खटिएको नौ जनाको मोबाइल टोलीले उनीहरुलाई अवैध औषधिसहित नियन्त्रणमा लिएको हो ।
पक्राउ परेका व्यक्ति, अवैध औषधि र मोटरसाइकल आवश्यक कारबाहीका लागि भन्सार कार्यालय धनगढीको जिम्मा लगाइएको जनाइएको छ ।
