धनगढी। सुदूरपश्चिम प्रदेशसभा सदस्य तथा पूर्वमन्त्री लक्ष्मी विकले राज्यले आफ्नो ऊर्जा रोजगारी सिर्जना गर्ने क्षेत्रमा केन्द्रित गर्नुपर्ने बताएकी छन् ।
गृह मन्त्रालयले दार्चुलाको गोकुलेश्वरसहित देशका करिब दुई दर्जन स्थानमा ईलाका प्रशासन कार्यालय खोल्ने निर्णय गरेपछि उनले आफ्नो धारणा सार्वजनिक गर्दै यस्तो बताएकी हुन् ।
सामाजिक सञ्जालमार्फत उनले भनेकी छन्- ‘नागरिकता वितरणका लागि मात्र कार्यालय खोल्नेभन्दा जनतालाई प्रत्यक्ष लाभ पुग्ने रोजगारीमूलक संरचना निर्माण गर्नु आजको युग सापेक्ष आवश्यक हो ।’
उनले संघीयता कार्यान्वयन भइसकेको अवस्थामा पुराना संरचनालाई निरन्तरता दिनु उपयुक्त नभएको प्रष्ट पारेकी छन् ।
‘हामी सूचना प्रविधि र ई–गभर्नेन्सको युगमा छौं। कागज होइन, कागजरहित सरकार बनाउनुपर्ने हो। नागरिकता मात्र वितरण गर्ने कार्यालयमा ठूलो बजेट खर्च गर्नु जनताको प्राथमिकतासँग मेल खाँदैन’ उनले भनिन् ।
पूर्वमन्त्री विकले विशेषतः दार्चुला र सुदूरपश्चिमका युवाहरू रोजगारीका अभावमा वैदेशिक रोजगारीतर्फ धकेलिनुपरेको तथ्य स्मरण गर्दै रोजगारी र आर्थिक अवसर सिर्जना गर्ने नीति र संरचना नै अहिलेको आवश्यकता भएको बताइन् ।
पूर्वमन्त्री विकले केही नेताहरूले ‘फलानोको पहलमा कार्यालय खुल्यो’ भन्दै श्रेय लिने प्रतिस्पर्धा भइरहेको पनि बताएकी छन ।
कृषि, पर्यटन र उद्योगमा लगानी गर्न सके रोजगारी सिर्जना मात्र होइन, स्थानीय स्रोत साधनलाई उत्पादनमूलक क्षेत्रमा लगाउन सकिने पूर्वमन्त्री विकको भनाइ छ ।
अनावश्यक संरचना थप्नेभन्दा उत्पादन र उद्यमशीलतालाई प्राथमिकता दिन सरकारलाई उनले आग्रह समेत गरेकी छन् ।
