धनगढी । सुदूरपश्चिम प्रदेशका सामाजिक विकास राज्यमन्त्री सरस्वती खड्काले स्वास्थ्य बीमा देशमा समृद्धि ल्याउने कार्यक्रम भएको बताएकी छन् ।

स्वास्थ्य बीमा बोर्डले शुक्रबार धनगढीमा आयोजना गरेको आव २०८१/८२ को प्रदेशस्तरीय वार्षिक समीक्षा गोष्ठी कार्यक्रममा बोल्दै उनले स्वास्थ्य बीमा विकासको पहिलो कार्यक्रम भएको बताइन् ।

उनले भनिन् ‘विपन्न गरिब आर्थिकरुपमा कमजोर वर्गको स्वास्थ्यमा पहुँच पुगोस् भन्ने उदेश्यले नेपाल सरकारले ल्याएको स्वास्थ्य बीमा कार्यक्रम निकै सह्रानीय रहेको छ ।’

उनले कार्यक्रम राम्रो हुनुका साथै यसमा चुनौति पनि रहेका बताइन् । उनले स्वास्थ्यमा बीमा नागरिकको पहुँच बढाउन प्रदेश सरकारले आफ्नो भूमिका निर्वाह गर्ने बताइन् ।

उनले भनिन् ‘प्रत्यक्षरुपमा जसले स्वास्थ्य बीमाबाट सेवा पाएको छ उहाँहरुबाट बुझ्दा यो एकदमै राम्रो कार्यक्रम हो । निरन्तर हुनु पर्ने कार्यक्रम हो । गरिब दुःखिको स्वास्थ्यलाई सुधार गर्ने कार्यक्रम हो ।’

स्वास्थ्य बीमा बोर्डका अध्यक्ष चन्द्रकहादुर थापाले स्वास्थ्य बीमा कार्यक्रम राम्रो हुँदाहुँदै पनि ओझेलमा पर्न थालेको बताए । उनले यसलाई अझ प्रवाभकारी बनाउन तीन तहका सरकारबीच समन्वय आवश्यक रहेको बताए ।

अध्यक्ष थापाले बीमा कार्यक्रममार्फत सहज सेवा उपलब्ध गराउने मान्यताका साथ बीमा बोर्ड अगाडि बढेको बताए । त्यस्तै, बीमितलाई गुणस्तरी सेवा उपलब्ध गराउन प्रयत्नशील रहेको समेत बताए । उनले यस कार्यक्रमलाई प्रविधिमैत्री बनाउन समेत आवश्यक रहेको बताए ।
कार्यक्रममा बोल्दै स्वास्थ्य बीमा बोर्डका कार्यकारी निर्देशक डा.रघुराज काफ्ले स्वास्थ्य बीमा कार्यक्रम नेपालको उच्च प्राथमिकतामा रहेको बताए ।

उनले स्वास्थ्य बीमा कार्यक्रम लागु भएको १० वर्षको अवधिमा प्राप्त उपलब्धी महत्वपूर्ण भएको बताउँदै यसलाई अझै विस्तार गर्न आवश्यक भएको बताए । उनले देशभरी करिब ६५ लाख नागरिकले स्वास्थ्य बीमा गरेको बताउँदै दैनिक ५० हजार बीमितले स्वास्थ्य सेवा लिने गरेको बताए । सुदूरपश्चिम प्रदेशमा बीमित मध्ये ७७ प्रतिशत लक्षित वर्गका नागरिक भएको बताए । जसको निःशुल्क बीमा गर्ने गरिएको उनले बताए ।
तीन हजार पाँच सयको बीमा प्रिमियमले एक लाखसम्मको उपचार सेवा पाउने र ठूलो रोग भए थप एक लाखसम्मको उपचार सेवा पाउने उनले बताए । देशभर ५०२ स्वास्थ्य संस्थाबाट स्वास्थ्य बीमा गराएका नागरिकले उपचार सेवा लिने गरेको उनको भनाइ छ ।

सम्पन्न नागरिक स्वास्थ्य बीमा दायरामा नआएको बताउँदै उनले ती नागरिकलाई पनि समेट्न तीनै तहका सरकारबीच समन्वय आवश्यक भएको बताए । काफ्लेले गत आव २०८१/८२ मा स्वास्थ्य बीमाको आम्दानी तीन अर्ब ७४ करोड मात्रै भएको र बीमा बोर्ड खर्च मासिक सवा दुई अर्ब हुने गरेको बताए ।