धनगढी । कैलालीमा लागुऔषधसहित पाँच जनालाई पक्राउ परेका छन् । ५ किलो ६९० ग्राम चरेश र ४ ग्राम ९० मिलिग्राम खैरो हेरोइनसहित उनीहरु पक्राउ परेको जिल्ला प्रहरी कार्यालय कैलालीले जनाएको छ ।
विशेष सूचनाका आधारमा लागूऔषध व्युरो शाखा धनगढी, वडा प्रहरी कार्यालय धनगढी र प्रहरी चौकी त्रिनगरबाट खटिएको संयुक्त प्रहरी टोलीले धनगढी उपमहानगरपालिका–२ त्रिनगर ब्यारेलबाट गोदावरी नगरपालिका-१ बस्ने ३५ वर्षीय वीरबहादुर रावललाई २ ग्राम ७६० मिलिग्राम खैरो हेरोइनसहित पक्राउ गरिएको प्रहरीले जनाएको छ।
त्यस्तै, जिल्लाको चुरे गाउँपालिका–३ बस्ने ३२ वर्षीय मोहन मल्ललाई शंका लागि चेकजाँच गर्दा उनको मोबाइलको खोलभित्र लुकाइराखेको ५९० मिलिग्राम खैरो हेरोइन बरामद गरिएको जनाइएको छ ।
धनगढी उपमहानगरपालिका–२ मिलनचोकस्थित जयराम होटल एण्ड लज रेष्टुरेन्टमा छापा मार्दा होटलका सञ्चालक ३२ वर्षीय राम बोहराको साथबाट ५ किलो ६९० ग्राम चरेश फेला पारी बरामद गरिएको जिल्ला प्रहरी कार्यालय कैलालीले जनाएको छ ।
यस्तै, धनगढी उपमहानगरपालिका-१२ जुगेडाबाट सोही ठाउँका २३ वर्षीय विजय विक र धनगढी-७ का २२ वर्षीय प्रदीप रानालाई ७४० मिलिग्राम खैरो हेरोइनसहित पक्राउ गरेको जनाइएको छ ।
पक्राउ परेका पाँचै जनालाई जिल्ला प्रहरी कार्यालय कैलालीको हिरासतमा राखी थप अनुसन्धान भइरहेको प्रहरीले जनाएको छ ।
